Юрий Зайцев Татарстан Промышленность да сатулымаш министерствын коллегийжын иктешлыше заседанийыштыже лийын.
Тылеч ончыч тудо республикысе промышленный предприятий-влакын продукцийышт дене палдарыше выставкым ончал савырнен. Тушто Татарстанысе 50 наре предприятий ден вузын изделийышт ончыкталтын.
Юрий Зайцев пошкудо-влакын порын вашлиймыштлан тауштен да палемден: «У соглашений Марий Эл ден Татарстан кокласе партнёр да йолташле кылым у кӱкшытыш луктеш. Ме чыла тӱҥ отрасльыште – промышленностьышто, агропромышленный комплексыште, увер технологийыште, туризмыште, тӱвыраште – пашам пырля ышташ ямде улына. Тидлан йӧнна изи огыл».
Бизнесым вияҥдаш транспорт дене кылдалтше чаракым кораҥдымаш полшышаш. Йошкар-Оласе аэропортышто у пассажир терминал чоҥалтеш, южыш нӧлталтме да шичме полоса пужен ышталтеш. Зелёный Дол – Яранск кӱртньыгорным умбакыже шуйымо йодыш решатлалтеш. Тидыже регионла кокласе кылым саемда, сату оборотым нӧлталеш. Республикыште илыше ик еҥлан шотлымаште 1,5 турист логалеш. Татарстан гыч Марий Элыш турист йогын кок ий жапыште кок пачаш наре кугемын.
Пашам пырля ыштыме кугу событий семын 2023 ийыште “Россий – ислам тӱня» тӱнямбал экономике форумышто, «Казань Экспо» площадкыште эртыше «МиР. Магазин и Ресторан» тӱнямбал ярмиҥгаште лиймым ончыкташ келшен толеш. Кокымшыштыжо Россий ден Азийыште торгайыме-йӱкшыктарыше оборудованийым ыштен лукшо-влак шке продукцийыштым ончыктеныт. Тыгай мероприятий-влак паша кылым вияҥден колташ полшат. Республикна гыч тушто лийше 40 процент организаций продукцийым колташ контрактым ыштен.
Марий Эл вуйлатыше Юрий Зайцев Татарстан Республикын раисше Рустам Миннихановлан пошкудо регионышто ончыл опыт дене палыме лияш йӧным ыштымылан тауштен, да нуно пашам пырля ыштыме нерген соглашенийым пеҥгыдемденыт.
Марий Эл вуйлатышын пресс-службыжын уверже негызеш Ю.ИСАКОВ ямдылен. Фотом пресс-службо деч налме
