Курчак театрыште элнам аралыше воин-влакын ешышт дене регионал кӱкшытан конференций эртен. Тушто 2023 ийыште ыштыме паша лектышым иктешленыт.
Конференций жапыште Марий Эл правительстве председательын икымше алмаштышыже Михаил Васютин «Жена Героя. Мать Героя» фотовыставкым ончен лектын.
– Кызыт элна вуй ӱмбалнына тыныс кава верч кредалеш, сандене республикынат специальный военный операцийын участникше-шамычын ешыштлан полша. Ты пашаш Россий президентын кӱштымыж почеш Шочмо элым аралыше воин-влакын ешышт шотышто комитет чолган ушнен.
Регионыштынат Марий Эл правительствын резерв фондшо кӱшеш «Кичиер» ден «Сосновый бор» санаторийлаште боец ден СВО-н участникше-шамычын ешыштлан тазаҥдыме сменым ыштыме. Тудо тений 4-17 мартыште эрта. Поро мут да паша дене полшен, геройна-влаклан ӱшанле тылым ыштышаш улына. Нацизм ваштареш кредалше-шамычлан сеҥымашым лишемдаш полшымыштлан кугу тау, – Марий Эл вуйлатышын саламлымашыжым Михаил Васютин лудын пуэн.
Шочмо элым аралыше воин-влакын ешышт шотышто комитетын регионал штабше 2023 ий февральыште пашам ышташ тӱҥалын. Ты организаций СВО-што участвоватлыше военнослужащий-влаклан, тушто ӱмыр лугыч лийше воин-шамычын ешыштлан полша.
2023 ийыште СВО участник, тыгак нунын ешышт деч пурышо 359 йодмашым тергеныт. СВО-шко 91 тонн гуманитар грузым, 107 маскировочный сеткым, 300 килограмм окоплык сортам, 10 единице техникым колтеныт. Тыгак школьник-влак боец-шамычлан 500 серыш ден саламлымашым возеныт.
Марий Эл вуйлатышын пресс-службыжын уверже негызеш Елена Эшкинина ямдылен
