Программым Дмитрий Медведевлан ончаш пуат
25.10.2019
Марий Элым вуйлатыше Александр Евстифеев 22 октябрьыште правительстве председательын икымше алмаштышыже Александр Сальников дене вашлийын мутланен. Тидын годым Марий Элым социально-экономически вияҥдыме программым ямдылыме пашам каҥашеныт. Вашлиймашнан темыже – республикым сциально-экономически вияҥдыме федерально-республиканский программын проектше. Лишыл кечылаште тудын дене Российын премьер-министрже Дмитрий Анатольевич Медведевым палдарат. Республикын программыже тачысе кечылан ямде мо? Специалистна-влак велым замечаний уло? Нине йодышым Александр Евстифеев икымше алмаштышыжлан пуэн. Александр Сальников республикым социально-экономически вияҥдыме программе исполнительный кучемын федеральный органлаштыже кутырен келыштарыме процедурым эртен манын вашештен. Программым ямдылыме да Российын Минстройышкыжо палемдыме жапыште колтымо, тылеч вара тудын параметрже-влакым исполнительный кучемын федеральный органже-влакын еҥышт дене кутырен келыштарыме паша тўҥалын. Программын проектше индеш министерстве ден департамент гоч эртен, тидын годым икмыняр замечанийым ыштеныт. Нуным лу кече жапыште кораҥден шуктымо, каласен Александр Сальников. Ушештарена: 2019 ий августышто Марий Элын кураторжо – Россий Федерацийын чоҥымо паша да жилищно-коммунальный озанлык министрже Владимир Якушев республикыш толын коштын ыле. Тудо тунам икмыняр объектыште лийын да совещанийым эртарен. Тидын деч вара кундемым социально-экономически вияҥдыме пашан икмыняр тўҥ направленийже дене стратегический сессий-влакым эртарыме. Тушто экономикым, ялозанлыкым, изи да кокла кугытан предпринимательствым, социальный сферым, оласе средам вияҥдыме йодышла дене пайдалын ўчашен каҥашыме пашам пленарный заседанийыште иктешлыме. Туштак Марий Элыште Республикым социально-экономически утларак писын вияҥдыме планым ямдылыме пашан икмыняр ужашыжым сайлан шотлымо. |