Проект-влакат вияҥдаш полшат

Марий Эл вуйлатыше Александр Евстифеев «Общее будущее. Факторы успеха и инструменты его измерения» тӱнямбал форумын пашашкыже ушнен.

Тематический площадкылаште ялысе кумдык-влакым вияҥдыме (тӱзатыме), экономикын кушмыжо, калыклан паша верым ситарыме, илышлан лӱдыкшыдымӧ йӧнан средам ыштыме, вӱд поянлыкым аралыме, качестван образованийым чылаштын налын кертме, бизнес, моло дене кылдалтше кӱлешан йодыш-влакым каҥашеныт. Республик гыч мийыше кугу делегаций, а тудым Александр Евстифеев вуйлатен, ятыр площадкыштыже лийын.

- Вияҥмаш национальный проект-влак денат кылдалтеш. Мутлан, Юл эҥер нерген – тиде «Чистая река» региональный проект. Але республикын чодыра фондшым аралымаш, экономикым, ялозанлыкым вияҥдымаш. Мыланна чылажат моткоч кӱлешан, - палемден республик вуйлатыше.

Тыгак Марий Эл вуйлатыше форумышто рашемдыме эше ик кӱлешан задаче нерген ойлен – тиде Россий Федерацийын субъектше-влак коклаште пайдале вашкыл.

- Мемнан Юрино ден Килемар районлашке газым пуртыман. Но Килемар районыш тудым Киров областьын маршрутшо, Санчурск поселко, гоч гына колташ лиеш. Теве тыланда Российын кок регионжын вашкылже ден вияҥмашыже шотышто пример. Тыге – ятыр направленийыште, - каласен тудо.

Весымат палемден: Марий Эл правительствын тӱҥ задачыже – республикым вияҥдымаш. А тидыже 12 национальный проектым илышыш пуртымо дене лиеш.