29 февральыште Россий Федерацийын президентше Владимир Путин Федеральный Погынлан посланийым ыштен. Тушто Марий Эл гыч регионым вуйлатыше Юрий Зайцев ден Кугыжаныш Погынын председательже Анатолий Смирнов лийыныт да заседаний деч вара В.Путинын ойжым акленыт.
Ю.ЗАЙЦЕВ:
– Содержаниян да моткоч куатле. Лач тыге ойлен кертам Россий Федераций президент Владимир Владимирович Путинын Федеральный Погынлан посланийже нерген.
Таче ола ден села-влакын сай велыш вашталтмыштым, кугыжаныш полышым кажныже ужеш. Элна производствым кугемда, обороным пеҥгыдемда да палемдыме курсыш ӱшанлын кая. Россий «Еш», «Российын молодёжьшо», «Кужу да чолга илыш», «Кадр», «Данный-влак экономике» у проект-влакым илышыш пурташ тӱҥалеш.
Калыкын ончылъеҥже шке посланийыштыже элнан регионжо-влакым вияҥдыме нерген посна ойлен. Президент бюджет кредит шотышто парымын кок кумшо ужашыжым списатлаш задачым шынден. Аныклыме оксам инвестицийлан да инфраструктур проект-влаклан полшаш колташ тӱҥалыт. Тыгай пунчал мемнан республиклан моткоч кӱлешан да Марий Элын ончыкылыкшылан сай йӧным ышта.
Путин дене элнам сеҥымаш ден кугу вашталтыш гына вучат манын ӱшанем. Владимир Владимировичын мутшо гыч, Россий шке суверенитетше да лӱдыкшыдымылыкшӧ верч шога, Донбассыште да Новороссийыште соотечественник-шамычын илышыштым арала. Чын верч кредалмаште пытартыш роль лачшымак россий граждан-влакын, нунын икоян, шочмо эллан ӱшанле улмышт да тудын пӱрымашыжлан мутым кучымышт лиеш.
Ме чынжымак ик кугу еш улына, сандене чылажымат кузе шонена, туге ыштена.
Тау тыланда, Владимир Владимирович, мемнан виян, икоян да сеҥаш лийдыме Российлан!
А.СМИРНОВ:
– Владимир Путинын посланийже чылажымат авалтыше лийын. Российын шке суверенитетше верч эреак шогымыжым, элкӧргӧ пашашкыже нигӧм пуртыдымыжым да спецоперацийын задачыже-влакым шукташ чыла ыштымыжым эше ик гана палемдыме.
Элым вуйлатыше тӱҥ паша корно-влакым 2030 ий марте палемден. Экономикын чыла сферже ден социальный сферын вияҥме, йочан еш ден спецоперацийын участникше-влаклан полшымо, граждан-шамычын йодышыштым решатлыме радамым рашемден. Льготан ипотекым, школ ден йочасадлам, тӱшкагудо ден профобразований тӧнежлам олмыктымо пашам умбакыже шуйымо, бюджетник-влаклан пашадарым тӱлымӧ ик модельым ыштыме, «Ялысе тӱвыра пашаеҥ» программым илышыш пуртымо, кӱкшӧ технологиян отрасльлан специалист-шамычым ямдылыме, сад участкылаште социальный газификаций программым кумдаҥдыме да моло йодыш республикланна моткочак кӱлешан улыт.
Конешне, Марий Элым вияҥдымаште Владимир Владимирович Путинын Россий Федераций субъект-влакын бюджет парымыштым кок кумшо ужашым списатлыме кӱшеш иземдыме да 2030 ий марте социально-экономически вияҥме индивидуальный программе-шамычым шуйымо нерген темлымашыже моткоч кӱлешан. Ушештарем, нине программе-влакым шуйымо нерген темлымашым ӱмаште октябрьыште Федераций Советыште Марий Элын кечыжым эртарыме годым пуртымо.
Чыла кӱкшытан законодатель-влакым президентын тӱҥалтышыжым, ты шотыштак вич у национальный проектым, илышыш пуртышашлан нормативный правовой акт-влакым ямдылыме да приниматлыме паша вуча. Кугыжаныш Погынын депутатше-влак тидлан ямде улыт.
М.ИВАНОВА ямдылен
