Марий Эл правительстве председательын икымше алмаштышыже Михаил Васютин «Управленческая мастерская» семинарын пашашкыже ушнен. Тудо Санкт-Петербургышто эртен.
Семинарын участникше-влак, а тиде Россий Федерацийын президентшын Йочан праваже шотышто уполномоченный Мария Львова-Белова, федеральный ден региональный исполнительный кучем-влакын органыштын, научный ден образовательный сообществе, мер организаций-влакын еҥышт, тыгак элын 16 регионжо гыч врач ден психолог-шамыч, икшыве-влакын кризис состоянийыштын профилактикышт шотышто йодышым каҥашеныт.
Марий Элыште шкем шке пытарыме шотышто профилактике дене келшышын ятыр мероприятий эртаралтеш. Тушко тунемме организаций, ведомство, мер организаций, еш-влакым ушат да тренинг, социально-психологический тестирований, класс шагат, мутланымаш-влак лиедат.
Михаил Васютин палемден: икшыве-влак коклаште шкем шке пытарымаш шагал вашлиялтше манын, яра жапыштым чолган эртарышашыштлан посна тӱткыш ойыралтеш. Тидлан таза илышлан кумылаҥдыме, ӱдыр-рвезе-влакым патриотизм шӱлышеш куштымо, волонтер паша, шкем ончыкташ йӧным ыштыме дене кылдалтше республиканский мероприятий-влак полшат.
Тунемме организацийлаште икшыве-влакын торжа койышыштым шижтараш манын, «Школьная служба примирения (медиации)» пашам ышта. Республикыште чылаже 130 тыгай службо уло. Тушто 650 утла еҥ тырша.
Марий Эл Вуйлатышын администрацийжын информаций паша пӧлкажын уверже негызеш Л.Камалетдинова ямдылен
