Татарстан Республикыш паша дене мийышыла, Марий Элын делегацийже правительстве председательын алмаштышыже Дмитрий Троицкийын вуйлатымыж почеш «Алабуга» посна экономике кундемыште да Набережные Челны оласе «Мастер» Камский индустриальный паркыште лийын.
Марий Элын правительствыже регионышто промышленно-производственный сынан посна экономике кундемым ыштыме шотышто пашам шуктен толеш. Татарстанын тыгай опытшо, сандене тушко мийыме пеш пайдале лийын. Адакше тыгай шонымаш денак кок республикыште экономикылан вуйын шогышо кок министерствын специалистышт кокла гыч пашаче группым чумырымо да тиде пашам кузе тӱҥалшаш нерген кутырымо.
Тыгай проектым илышыш пурташ Марий Элыште чыла условий уло. Промышленность республикын тӱҥ отрасльжылан шотлалтеш да регионысо чумыр продуктын 30 процентшым пуа. Республикна торгайыме-йӱкшыктарыше оборудованийым, электроустановко изделийым, кӱртньӧ омсам лукмо шотышто Российыште ончылно кая. Оборонно-промышленный комплекс ден радиоэлектронике предприятий-влак виян ыштат да регионысо чумыр продуктын 20 процентшым пуат.
Марий Элыште посна экономике кундемым ыштымаш резидент-влаклан парыш гыч, тыгак пого, мланде да транспорт налогла шотышто льготым пуа. Адакше тыште эрыкан таможньо кумдык лиеш: вес элла гыч кондымо да ты кундемыште кучылталтше оборудований ден продукций таможньо пошлине (10 процент) да ешартыш аклан налог (20 процент) деч утаралтыт. Сандене пошкудо республикын тыгай опытшым шымлен толмаш пайдале лиеш.
Ю.ИСАКОВ ямдылен
