Марий Элыште специальный военный операцийыште улшо военнослужащий-влакын ешыштлан полышым пуымо паша умбакыже шуйна.
Школышто 5-11-ше классыште тунемше, кыдалаш профессионал организацийыште очно шинчымашым погышо-влаклан шокшо кочкышым яра пукшымаш; йочасадыш верым черет деч посна пуымаш – республикым вуйлатыше Юрий Зайцевын кӱштымашыже почеш, мобилизоватлыме-влакын ешыштлан полышым пуымо гыч ужаш гына. Моло ешартыш социальный мер шотышто Марий Эл образований да науко министрын пашажым шуктышо Лариса Ревуцкая тыге палемден: кугыжаныш йочасадлан, кружокыш (секцийыш але ешартыш шинчымашым пуышо моло организацийыш) коштмылан ача-ава деч оксам огыт нал. Чыла тидын нерген республикыште частичный мобилизаций шотышто координаций советын заседанийыштыже ойленыт. Тушто Марий Элын прокуроржын икымше алмаштышыже Дмитрий Талипов каласен: «Республикыште ситуаций сай. Шуко ыштыме коеш».
Лариса Ревуцкаян увертарымыж почеш, специальный военный операцийыште улшын ешыж гыч дошкольный, общий да кӱшыл образованийым пуышо тунемме верлаш ийготыш шудымо 996 йоча коштеш, 43-шо профессионал образованийым налеш. Чылаштланат кечылан ик гана шокшо кочкыш яра пукшат. «Кум студент оксала шинчымашым поген гын, ынде яра тунемеш», – министрын пашажым шуктышо каласен. Тудо палемден: частичный мобилизаций тӱҥалме кече гыч регионын Образований да науко министерствышкыже ешартыш полышым пуымо шотышто 11 йодмаш пурен, чылажымат писын ончымо да кӱлеш мерым ыштыме.
Марий Элым вуйлатышын кӱштымашыже почеш специальный военный операцийыште улшо военнослужащийын кӱшыл тунемме верыште шинчымашым погышо икшывыжлан 2000 теҥге кугытан стипендий пуалтеш. Кызытеш тудым республикыште 4 еҥ налеш.
Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен
