15 августышто Марий Эл вуйлатыше Юрий Зайцев ден Россий Федерацийын пӱртӱс поянлык да экологий министрже Александр Козлов Йошкар-Олаште Изи Какшан серыште аралыше сооруженийым чоҥымо йодышым каҥашеныт.
Регион вуйлатыше олан ик ужашышкыже, Ширяйково микрорайоныш, вӱд чот пура манын палемден. Тыгай годым 40 илыме пӧрт, школ, йочасад да моло социальный объект-шамыч азапыш логалыт. Тымарте олан эше ик ужашыштыже тыгай нелылык лийын. Аралыше сооруженийым ыштыме дене тудым сеҥен кертме.
Министр палдарен: 4 километр утла кужытан тыгай сооруженийым чоҥаш проект-смете документаций ышталтын.
– Федеральный бюджет гычат полыш лийже манын, регионлан икмыняр документым ямдылыман. Тунам ме министр-влак кабинет дене 2024-2026 ийлаште оксам ойырышаш йодышым ончен кертына, – каласен Александр Козлов.
Министрын палдарымыж почеш, Российысе вӱд поянлык федеральный агентстве регионлан гидротехнический сооружений-влакым капитально олмыкташ окса дене полша. Тыге 2023 ийыште Черный Ключ эҥерыште гидроузелым капитально ачалыме пашам мучашлаш субсидий ойыралтеш. А 2025 ийыште республиклан Ургаш, Нуж, Туньинка да Большое Акашево ял воктенысе эҥерлаште тыгаяк пашам шукташ оксам ойыраш палемдалтеш.
Вашлиймаште тыгак чодырам пожар деч аралыме йодышым каҥашеныт. Тидлан 2023-2025 ийлаште лесопожарный техникым да кӱлеш оборудованийым налаш регионлан 80 миллион утла теҥге ойыралтшаш.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен
