Марий Элым Вуйлатыше Юрий Зайцев «Справедливый Россий – патриот-влак – чын верч» партийын региональный пӧлкажлан сусыргышо-влакым утарышашлан тактический носилкам урген ямдылыме проектшым шукташ полшаш кӱштен.
Ончыкылык паша дене кылдалтше чыла йодышым партийын региональный пӧлкажын Советшын председательже Наталия Глущенко дене вашлиймаште каҥашыме.
Ондак республикым вуйлатышын полшымыж дене Йошкар-Олан администрацийже партиец-влаклан ик муниципальный зданийыште кок кабинетым ойырен. Иктыштыже кызыт носилкым погат, весыштыже ургымо цехым почмо.
Тактический носилкым бой каен шогымо условийыште сусыргышо военнослужащий, доброволец да спецопераций кундемыште улшо тынысле еҥ-влакым писын эвакуироватлышашлан лӱмын келыштарыме. «Суксын шӧртньӧ кидше» волонтёр движенийын цельжылан утларак шуко еҥын илышыжым арален кодымаш шотлалтеш. Сандене ме поро кумылан еҥ-влакын полшен шогымышт кӱшеш носилкым урген ямдылена да фронтлан ярак колтена, каласен Наталия Глущенко. Продукцийым шукырак ыштен лукшашлан тачысе кечылан мыланна ургымо машинке-влак кӱлыт, ешарен тудо.
Марий Элым вуйлатыше Юрий Зайцев партийын региональный пӧлкажын Советшын полшаш йодмыжлан порын вашештен да ты задачым шукташ полшаш сӧрен.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
