|
Покто веле – начар корно ок колто
16.04.2014
Кодшо вӱргечын Марий Элыште автомобиль корным олмыктымо паша официально тӱҥалын. Тидын дене келшышын, Марий Элым вуйлатыше Л.Маркелов Йошкар-Олаште корным олмыктымо йодыш дене, верыш лектын, совещанийым эртарен.
Рӱдолан мэрийжын пеҥгыдемдыме график дене келшышын, олмыктымо паша Гагарин проспект гыч ошкылым ыштен. Успенский урем гыч Ленин проспект марте лакылам петыреныт. Тыгодым, пайдаланыме у технологий, ешартыш техникым да паша вийым кучылтде, асфальт-бетон шартышым писын да чаплын тӧрлаш йӧным пуа. Оласе властьын тений налме у техникат кугун полша.
Ты технологий почеш кок машина ышта. Ончыч лакым мушкын луктыт, пуалтен коштат да грунтовкым ыштат, вара тыгыде кӱ дене иквереш эмульсийым оптат. Автомашина ораваш материал пижын ынже кай манын, ӱмбаке кукшо тыгыде кӱм ешарен таптат. Икмыняр минут гыч корно кудал эрташ ямде лиеш. Ты технологийлан ночко игечат чаракым ок ыште. Сменыште машина 100 квадрат метр кумдыкым олмыкта. Тыгай шартыш кужун чыта, маныт специалист-шамыч.
Л.Маркелов палемден: «Рӱдолаште шуко корныжо кодшо курымын 70-80-ше ийлаштыже ышталтын, тунам автомашина-влак ешаралт кертмым шотыш налме огыл. Адакше температур чӱчкыдын вашталтмылан кӧра корно шартыш писын локтылалтеш. У технологий почеш олмыктымаш ончычсо деч шергыш ок шу, но пашам палынак писешта. Жап эртыме семын чыла корным асфальт дене леведына».
Правительстве председатель оласе властьлан корным ыштыме пашам тӱткын эскераш да кажне теҥгем шотлаш каласен. Тений Йошкар-Оласе корнылам олмыкташ бюджет гыч 200 миллион теҥгем ойырымо. Республикысе автокорнылаште ты пашам шукташ 700 миллион теҥгем колтымо лиеш.
Марий Эл Республик Вуйлатышын мер кыл ден увер виктемже
Кусарымаш - А.Адреев (газет "Марий Эл") |
Покто веле – начар корно ок колто
