Почтальонын пашадарже кунам кӱза?

Марий Элым вуйлатыше Александр Евстифеев Россий Почтын Волга 1 макрорегионын директоржо Елена Зайцева дене республикысе почтальон-влакын пашадарыштым кӱзыктымӧ шотышто йодышым каҥашен. Паша вашлиймаште тыгак Марий филиалым вуйлатыше Илья Сахаров лийын.

Александр Евстифеевын мутшо почеш, почтальонын пашадарже, отделений-шамычын материально-технический базышт, ялысе калык ден почтын вашкылышт шотышто Россий Почто дене каҥашымаш лийын. «Лектыш лийже манын, паша планым, корно картым ыштыман», – каласен тудо.

Таче республикыште 257 почто отделений ик эн мӱндырнӧ верланен. А чылаже ты сферыште 1833 еҥ тырша, тышеч почтальонлан – 772 еҥ, почто кыл операторлан – 316.

Россий Почтын Волга 1 макрорегионжым вуйлатыше Елена Зайцеван увертарымыж почеш, кызыт почто отделенийлам уэмдыме паша кая. Регион вуйлатыше тудым умбакыже шуяш каласен да ушештарен: шушаш ийыште республик 100 ияш лӱмгечыжым палемдаш тӱҥалеш. Чыла почто отделений гыч 193-шо яллаште верланен да кажныже калыклан социальный могырым кӱлешан пашам шукта: тӱрлӧ выплатым тӱлымыж деч посна тудо калыклан кочкыш да моло сатум темла.

Содыки кунам почтальон-влакын пашадарышт кӱза? Елена Зайцеван мутшо почеш, тиде паша этап дене эрташ тӱналеш. Тыге идалыкат пеле жапыште производствын тӱҥ персоналжын пашадарже рынкысе кокла пашадар марте кӱзышаш, тыгодым профессий шотыш налалтеш. Марий Элыште тиде паша 1,5 тӱжем еҥым авалта, тидыже чыла почто пашаеҥ гыч – 88 процентшым. Вашлиймаш мучаште Александр Евстифеев каласен: «Тарватыме йодышлам эше ик гана сайын ончен лекман».