Кодшо шуматкечын Руэм посёлко воктенысе ипподромышто татар калык пайрем – Сабантуй – гӱжлен.
Мероприятийым имнешке-влакын таҥасымашышт почын. Тушто сеҥышыш лекше Владимир Михайловлан Марий Эл вуйлатышын кубокшым Юрий Зайцев шкежак кучыктен. Марий Эл вуйлатышын пашажым жаплан шуктышым кугу уна семын гармонь сем почеш чак-чак дене сийлен вашлийыныт. Тудын дене пырля толшо уна-шамычымат майданыш ужатеныт. Тушко ошкылшыла, Медведево, Морко, Марий Турек районласе татар кудо-влакым ончалаш йӧн лийын. Лач нине районлаште татар-влак тӱшкан илат. Тӱвыра пӧрт-влакын кидмастарже, творческий коллектив-влак шке ыштыш-кучышышт, усталыкышт дене палдареныт.
Юрий Зайцев Плуг пайремыш погынышо калыкым саламлен да нунылан чыла порым, пиалым тыланен. Шке саламлымашыжым Татарстан Республикын президентше Рустам Миннихановат колтен. Марий Элын мусульманже-влакын духовный управленийжын председательже Фанус Салимгареев саламлыме шомак дене пырля кугурак ийготан-влакым пагалаш, изирак-влакым чаманаш, икте-весылан эре полыш кидым шуяш ӱжын. Пӧлек шотеш Юрий Зайцевлан тюбетейкым чиктеныт да пайремын кок символжым – имне статуеткым да шарфым – кучыктеныт. «Российысе калык-влакын тӱвыраштлан пӧлеклалтше идалыкыште калык йӱла дене кылдалтше тыгай мотор пайрем-влакым эртарымаш тӱшка тӱвыранам пойдараш полшат», – палемден тудо.
Умбакыже мероприятий шке йӱла радамже дене эртен. Тӱрло модыш, конкурс, концерт эртеныт. Кореш – татар калык таҥасмашыш пошкудо регионла гычат патыр-шамыч ушненыт.
Марий Эл вуйлатышын организаций да аналитике виктемжын уверже негызеш С.Носова ямдылен
Ушештарыман: пытартыш перепись почеш Марий Элыште 38 тӱжем наре татар ила, 12 тӱжемже – Йошкар-Олаште
