Марий Элым вуйлатыше Юрий Зайцев Россий Федерацийыште региональный вияҥмаш шотышто правительственный комиссийын президиумжын (штабшын) заседанийыштыже лийын. Тудым видеоконференций йӧн дене Россий правительстве председательын алмаштышыже Марат Хуснуллин вӱден. Тудо чоҥымо отрасльыште тений 9 тылзыште паша сайын кайымым палемден.
«Чоҥымо отрасльыште шуктымо паша кугыт кодшо ийысе тыгаяк жап дене таҥастарымаште 9 процентлан ешаралтын. Кум ий жапыште тиде отрасль 24 процентлан кушкын. Илыме верым пашаш колтымо шотышто ме кокымшо тылзе икшырымын пашам ыштена. 9 тылзыште 80 миллион наре кв. метрым пашаш колтымо. Тидыже кодшо ийысе тыгаяк жап дене таҥастарымаште 0,7 процентлан шукырак. Тений ме черетан рекордыш шуына, шонем»,- каласен Марат Хуснуллин.
Оперативный данный почеш, 2023 ийысе январь-сентябрьыште Марий Элыште план кодшо ийысе тыгаяк жап дене таҥастарымаште 0,5 процентлан эртарен темалтын. Чылаже 386,234 тӱжем кв. метр илыме верым пашаш колтымо, тидыже талукаш заданийын 89 наре процентше лиеш.
Республикыште чылаже 435,8 тӱжем кв. метр илыме верым ыштен шукташ палемдыме.
Марий Эл Республикым вуйлатышын администрацийжын информаций паша пӧлкажын уверже негызеш П.Шакиров ямдылен
