Пеледышым пыштыме

Тиде кечын Йошкар-Олаште Сеҥымаш бульварыште Российын Геройжын бюстшо воктене шарнымашан мероприятий эртаралтын. Легендыш савырныше командирын родо-тукымжо да митингыш погынышо-влак ончылно республикым вуйлатыше Александр Евстифеев мутым ойлен.

Коло ий ончыч гвардеец-десантник-влак Йўдвел Кавказыште законный огыл кугу вооружённый бандформирований ваштареш кредалыныт. 90 десантник 2,5 тўжем боевик ваштареш шоген. Неле бой 15 шагат утла шуйнен. Тиде шучко кредалмаште 84 гвардеец колен, 6 еҥ гына илыше кодын, палемден Александр Евстифеев.

Йўдвел Кавказыште закондымо вооружённый формированийым пытарыме годым патырлыкым да чолгалыкым ончыктымылан 2000 ий 12 мартыште Россий президентын указше дене 22 десантниклан, тидын шотыштак гвардий подполковник Марк Евтюхинлан, Россий Федерацийын Геройжо лўмым пуымо.

Воинский порысым аклымыж велым ончалаш гын, Марк Евтюхин кеч-кунамат герой, уста командир, профессиональный боец да ўшанле йолташ лийын. Тудын подвигше – патриот улмым да Шочмо эллан ўшанлын служитлымым ончыктышо чапле пример, каласен Александр Евстифеев.

Марк Евтюхинын тукым шўжарже Светлана Минина митингыш погынышо-влак ончылно ойлымыж годым изажын могай лиймыж нерген шарналтен каласкален.

6-шо ротын подвигшым Марий Элыште ветеран-влакат, самырык-влакат кўкшын аклат: республикыште десантник-влакым шарныме лўмеш патырлык урок, шарнымаш вахте, торжественный линейке, выставке, спортивный таҥасымаш-влак эртаралтыт. 2018 ийыште «Юнармий» Всероссийский детско-юношеский военно-патриотический мер толкынын региональный отделенийжылан Марк Евтюхинын лўмжым пуымо.