Марий Элыште вес ийын эртышашлык Федерал Сабантуйлан ямдылалташ тӱҥалыныт. А тудыжо 6 июльлан палемдалтын.
Рӱдӧ сцене Медведево районысо Руэм посёлкысо ипподромышто лиеш. Моло площадкылаштат мероприятий-влак эртат.
Кодшо кечылаште пайремым эртарен колтымо дене кылдалтше йодыш-влакым оргкомитетыште каҥашеныт. Тудын заседанийжым регион вуйлатыше Юрий Зайцев вӱден.
«Марий Эллан XXIV федерал Сабантуйым эртараш ӱшаныме – кугу чап да кугу ответственность. Тиде Марий Эл ден Татарстанлан гына огыл кугу событий, Российысе регионла гыч толшо уна-шамычланат. Оргкомитетын чыла еҥжым ты ӱшаным кугу ответственность дене шукташ йодам, – каласен вуйлатыше.
Марий Элын тӱвыра, савыктыш да калык-влакын пашашт шотышто министр Константин Иванов Федерал Сабантуйым пайремлыме годым 23 гыч 29 июнь гутлаште Татар тӱвыра арням эртараш палемдыме нерген увертарен. Тудын кышкарыште Татарстанысе национальный сылнымутын, сӱретче-влакын ончерышт, татар эстраде концерт, Муса Джалиль лӱмеш Татар кугыжаныш академический опер да балет театрын «Золотая орда» постановкыжо эртат.
Пайрем кечын ипподромышто «Марий этноял» площадкат пашам ышташ тӱҥалеш. Тушко республикын чыла муниципал районжо гыч кидмастар-влак шке пашаштым кондат, калык кочкыш дене сийлаш, тӱрлӧ йӱла дене палдараш тӱҥалыт.
Сабантуйын унаже-влак «Куреш» кучедалмашым, армрестлингым, масс-рестлингым, кирам нӧлтымашым, имнешке-влакын таҥасымашыштым эскерен кертыт. Плугын пайремыштыже ялозанлык технике ончер лиеш, республикын ты сферысе производительже-влак шке сатушт дене палдараш тӱҥалыт.
Юрий Зайцевын палемдымыж почеш, пайремлан ямдылалтме паша график почеш кая, туге гынат кумдыкым тӱзатыме, уна-влакым вераҥдыме, транспортым ямдылыме, лӱдыкшыдымылык дене кылдалтше йодыш-влакым ончылгоч шотыш налман.
Марий Эл вуйлатышын администрацийжын информаций паша пӧлкажын уверже негызеш С.Носова ямдылен
