7 мартыште Марий Эл вуйлатыше Юрий Зайцев 8 Март пайрем вашеш торжественный приёмышто республикыште ойыртемалтше ӱдырамаш-влак дене вашлийын. Мероприятий М.Шкетан лӱмеш Марий национальный драме театрыште эртен.
Юрий Зайцев палемден:
– Тендан кокла гыч кажныже пашаште сеҥымашыш шуын, еш возакым ыштымаште да аралымаште тырша. Те ешым, мӧҥгым да профессийым келшен толшын ушен моштеда. Те тӱрлӧ отрасльыште тыршеда: ялозанлыкыште, чоҥымаште, правам аралыше органлаште служитлымаште. Тыгодым тендан кокла гыч кажныже уло вийжым шке пашажлан пуа. Мыланна, пӧръеҥ-шамычлан, тиде тунар куштылгынжак огеш пуалт – але мӧҥгӧ, але паша. Мо мемнан эн шерге уло – еш – лач тендан вачӱмбалныда кучалтеш.
Тудо Россий Федерацийын президентше Владимир Путинын мутшымат ушештарен:
– Азам ыштымым ешараш полшышашлан, шочшан еш-влакын илышыштым саемдышашлан паша эре ышталтшаш.
Марий Эл вуйлатышын палемдымыж почеш, регионысо правительстве еш-влаклан полшышашлан кугу тӱткышым ойыра. Ончыкыжым тиде полыш эшеат кугемшаш.
Республик вуйлатыше ешарен: «Уло еш дене» всероссийский проект умбакыже шуйна. Тудо еш-влаклан утларак пеҥгыде лияш полша. Проект кажне ешлан у йӱлам шочыкташ да яра жапым оҥайын эртараш тарата.
Юрий Зайцев ойыртемалтше ӱдырамаш-влаклан сулымо наградыштым кучыктен да пашаштлан тауштен.
Пытартышлан тыгай тыланымашым каласен:
– Тек тендан чыла шонымашда шукталтеш. Тек суртыштыштыда тыныслык да вашумылымаш, а шӱмыштыда йӧратымаш озаланат!
* * *
Тиде кечынак Марий Эл вуйлатыше СВО-што улшо-влакын авашт да пелашышт дене вашлийын.
Юрий Зайцевын кӱштымыж почеш «Кичиер» санаторийыште нунылан посна специализироватлыме смене эртаралтеш. Регион вуйлатыше нине ӱдырамаш-влакым шушаш пайрем дене саламлен да палемден:
– Тендан шерге еҥда-влак кызыт мӧҥгышт деч тораште улыт, элнам аралат, шӱмышт кӱштымӧ почеш воинский порысым шуктат. Кажне салтак шеҥгелне тудлан эҥертыш семын виян ӱдырамаш шога. Тендан йӧратымашда боецна-влаклан чыла нелылыкым сеҥаш, тушман ваштареш пеҥгыдын шогаш полша. Кӧ шке лишыл еҥжым йомдарен, нунын ончылно вуем савем. Тендан пелашда, эргыда герой улыт. Нунын дене уло республикна кугешна.
Ойлымыж почеш, регионын кучемже специальный военный операцийын участникше-влаклан да нунын ешыштлан полшаш чыла вийым кучылтеш. Контрактым ыштыше боец-влаклан 250 тӱжем теҥге выплате тӱлалтеш. СВО участник-влаклан эреак гуманитар полыш колталтеш. Военнослужащий ден нунын ешыштлан полшышо поро кумылым ончыктымо фонд ышталтын. Полышым амалкалче, организаций, кучем орган-влак да тыглай еҥ-шамыч пуат.
Военнослужащий-влакын родо-тукымышт чыла тидлан тауштен ойленыт.
Вашлиймаш жапыште республик вуйлатыше СВО-што улшо-влакын авашт ден пелашыштын тургыжландарыше йодышыштлан вашештен.
Регион вуйлатыше 2024 ийым президент Владимир Владимирович Путин Еш идалыклан увертарен манын ушештарен да салтакна-влаклан лачшымак еш деч полышын моткочак кӱлешан улмыжым палемден.
– Тендан кумылда, шкендам кузе кучымыда дене моткочак шуко кылдалтеш. Мый тыланда пеҥгыде тазалыкым тыланем. Шарныза, те шкет огыдал. Ме тыланда эреак полшена, – каласен Юрий Зайцев.
Специальный военный операцийыште улшо-влакын авашт ден пелашыштлан посна смене 17 март марте эртаралтеш. Санаторийыште 200 ӱдырамашлан канашышт да тазалыкыштым пеҥгыдемдаш, тышкак психологический полышым пуымашат пурталтын, комплексный программе ышталтын.
Марий Эл вуйлатышын пресс-службыжын уверже негызеш Л. Камалетдинова ямдылен
