Марий Эл вуйлатыше Юрий Зайцев ден республикысе правительстве председательын алмаштышыже Степан Воронцов 30 декабрь гыч 9 январь марте регион кумдыкышто лӱдыкшыдымылык шотышто могай сӱрет лиймым каҥашеныт.
– Мыйын кажне кечын налме данный-влак дене келшышын, оперативный службо-влакын вияҥдыме режим дене пашам ыштымышт республикыште пайрем да каныш кечылаште ласка обстановкым арален кодаш полшен. Чаманаш кодеш, азап деч посна эртен огыл. Корно туткар ден пожар лийыныт. Сетьлаште вашлиялтше изирак аварий-влакым палемдыме жапыште кораҥдыме. Чыла службо сайын пашам ыштен.
Республикыште кызыт йӱштӧ игече шога да мемнан тӱшка задачына – корно-транспорт туткарым, кылмыме дене кылдалтше азапым, иян корнышто сусыргымым шижтарымаш, – каласен Юрий Зайцев.
Степан Воронцовын палдарымыж почеш, пайрем да каныш кечылаште Марий Элыште 25 пожар лийын, 3 еҥ илыш дене чеверласен. Тул тамакым шупшмо да коҥгашке олтымо годым лӱдыкшыдымылык правилым шотыш налдымылан, тыгак тӱньыкын, электрооборудованийын шаланыше улмыштлан кӧра ылыжын. Республикысе корнылаште 11 ДТП-ште 2 еҥ колен, икмыняр еҥ эмганен.
Марий Эл Вуйлатышын администрацийжын информаций паша пӧлкажын уверже негызеш Л.Камалетдинова ямдылен
