Пайдале вашлиймаш

​Шошо тўҥалме кечын республикым вуйлатыше правительстве пєртыштє журналист-влак дене вашлийын. Чайым подылын, мутланен шинчымаш кучем ден прессе коклаште пеш кўлешан йодышлам поро кумылын каҥашымашке савырнен. Чылажат шўкшак нерген мутланымаш гыч тўҥалын. «СМИ-лаште  «шўкшак нерген» законым йоҥылыш умылтарат», лач тыге каласен кундемым вуйлатыше журналист-влак дене мутланымыж годым. Александр Евстифеевын шонымыж почеш, журналист-влак шкеныштын возымаштышт кугу тарифлан тўҥ тўткышым ойырат, тидын годымак президентский законын тўҥ шонымашыжым – экологийым аралыме йодышым – єрдыжеш кодат. Лачшымак шўкшакым шот дене погымо да перерабатыватлыме паша пўртўсым амыргыме деч аралаш полшышаш. Элыште пеҥгыде бытовой шўкшакым погымо да перерабатыватлыме системе ышталтеш, тиде пашам шуктымым терген шогымаште вашталтыш лиеш.

Ик шагат шуйнышо мутланымаште Александр Евстифеев экономический, политический йодыш-влакым тарватен, уна-влакланат шке шонымашым луктын каласаш йєным пуэн.

«Марий Эл» ГТРК вуйлатыше Станислав Маринин ден «Марий Эл Телерадион» вуйлатышыже Светлана Талова ончыкылык планышт дене палдареныт. «Марийская правда» газетын генеральный директоржо-тўҥ редакторжо Сергей Дружинин «Российская газета» ик эн кугу издательстве дене пайдалын пырля тыршыме шумлык договорым ыштыме нерген кугешнен, ойлен.

«Марий Эл» газетын тўҥ редакторжо Александр Абдуловын ойлымыжо республикым вуйлатышым юрист семын «єрыктарен». Марий Эл Республик Кугыжаныш Погынын лукмо республиканский закон-влакым шке изданийыштышт савыктышашлан марий йылмыш газетын редаткоржо-влаклан шкаланышт кусараш логалеш улмаш. Александр Евстифеев тыгай экшык шотышто чылажымат рашемдаш культур, печать да национальность паша шотышто министр Константин Ивановлан кўштен. «Кугыжаныш Погын документ-влакым пуышаш, а газет нуным савыктышаш гына. Журналист-влакын возымо закон виян лийын огеш керт», – каласен республикым вуйлатыше.

Шкеныштын проблемышт да шумо сеҥымашышт дене рўдє оласе коллегыштым районласе журналист-влакат палдареныт. Тиде рольым шке ўмбакыже «Морко мланде» газетын тўҥ редакторжо Анатолий Титов налын. Анатолий Анатольевичын ойлымыжлан вашештымыж годым республикым вуйлатыше ялысе журналист-влаклан шкаланышт келшыше аудиторийым муаш темлен. Шагал еҥлан газетым савыктен лукмаш пайдале огыл, роскотыш гына пурта.

Пытартышлан ойыртемалтше журналист-влаклан наградым кучыктымо. Грамотым «Марийская правда», «Пенсионер ваш друг и советчик», «Марий Эл» газет редакцийлаште ыштыше журналист-влак налыныт.