Пайдале кыл пеҥгыдемшаш

​Республикын правительствыже ялозанлык техникым ямдылыше «Ростсельмаш» комбайн завод дене кылым утларак кумдаҥдаш лийын.

Ончыгече Марий Эл вуйлатыше А.Евстифеев тиде заводын коммерческий директоржо А.Швейцов, регионально вияҥмаш шотышто директоржо К.Ряснов да дочерний компанийын директоржо А.Храбров дене вашлийын. Вашлиймаш годым республикын машина ден трактор паркшым уэмдыме, техникылан сервис обслуживанийым кўчык жапыште шуктымо, тыгак кадрым ямдылымаште компанийын участвоватлымыж нерген каҥашыме.

Республикым вуйлатыше палемден: пасу пашам шке жапыштыже эртарен колташ Марий Элыште 1,5 тўжем утла трактор, пырчым шийме 320,  кургым ямдылыме 174 комбайн, 33 самоходный косилке, мландым пушкыдемдыме 1565 единице технике, 511 сеялке улыт. Тышечын шурным погымо 53 процент комбайным «Ростсельмаш» заводышто ямдылыме, кургым погымо комбайным – 15 процентым. Моло тўрлє техникым тиде предприятий гыч тылечат шагал кондымо.

- 53 процент гына шагал, тачысе вашлиймаш республикыште тендан холдингыште лукмо техникын ужашыжым кугемдышаш, - делегаций член-влакым вашлийшыжла, каласен республикым вуйлатыше. – Тидлан ваш келшыше условий нерген кутырен келшаш кўлеш.

Александр Евстифеев вашкыл шотышто икмыняр йогыным палемден. Нунын кокла гыч эн тўҥжє – техникым кондаш да тудым умбакыже обслуживатлаш.

- Но экономике мемнан ялозанлык производитель-влакым техникым кертме семын палемдыме деч утларак кужу жап кучылташ тарата. Российыште лукмо технике тидлан келыштаралтын, ресурсшым икмыняр пачаш эрта, - рашемден регион вуйлатыше.

Компанийын полышыжо республиклан кадрым ямдылыме шотыштат раш палдырнышаш. Тылеч посна МарГУ-н Аграрно-технологический институтшын тунемме аудиторийжым лўмын ямдылыме тренажер дене пойдараш полшышаш.

- Кызыт «кузе-гынат поген налаш» шонымаш дене пашам ыштыме жап эртен, кок-кум арня вараш кодмо курго ден пырчын лектышыштым палынак иземда. Сандене специалист-влакым ямдылыме паша ик ончыл верыш лектеш, - манын регион вуйлатше.

Александр Евстифеев республиклан да чумыр эллан эше ик кўлешан темым нєлталын – йытыным ончен куштымо специализироватлыме техникым ямдылаш тўҥалаш. Тидын годым ушештарен: федерал кўкшытыштє ялозанлык тиде культурым уэш ончен кушташ тўҥалмылан кугу тўткыш ойыралтеш.

- Мемнан дене ик озанлык, коло ий эртымек, уэш йытыным ўдаш тўҥалын да сай лектышыш шуын. Тидлан куанаш веле кодеш ыле, но нелылык лектын: Российыште йытыным поген налаш келыштарыме технике уке.

Тидын годымак концернын коммерческий директоржо А.Швейцов тиде йодышым контрольыш налмыж нерген каласен.

Вашлиймаш мучаште кок могыржат ончыкыжым сай кылым ыштыме шотышто ўшандарен ойлен.

Справка семын. «Ростсельмаш» комбайн заводын Российыште, Казахстаныште, Канадыште да Америкыште 13 предприятийже уло. Нуно ROSTSELMASH бренд дене техникым луктыт. Кызыт 24 тўрлє техникын 150 утла модель ден модификацийжым ямдыла. Россий рынкыште тиде заводын лукмо техникыже 70 утла процентыш шуэш. А тўнямбал рынкыште шурным да кургым погымо техникын 17 процентшым айла.