Пашам жапыштыже мучашлыман

Тидын нерген кодшо кечылаште республикын правительствыжын эртыше заседанийыштыже мутланеныт. Тудым Марий Эл вуйлатыше Александр Евстифеев эртарен.

Республикын промышленность, экономически вияҥмаш да торговльо министрын алмаштышыже Михаил Полубарьевын палемдымыж почеш, региональный проект-влакым илышыш пурташ 8,5 млрд. теҥге ойыралтын. Тидыже Юл кундем федеральный округышто сай показатель.

Региональный проект-влак дене келшышын, тений чылаже 22 объектым  шукташ палемдалтын. Нунын кокла гыч 13 пашам ышташ тӱналыныт. Тиде, мутлан, Марий кугыжаныш филармоний, Медведево районышто йочасад, 6 ФАП, вертолет площадке, 2 стадион-площадке, Красногорский поселкышто футбол пасу, икмыняр моло.

Тений идалык мучаш марте эше 8 объектым ыштен шуктышаш улыт. Тышеч кумытшым 95 %-лан чоҥымо. Эше кум объектыште паша 75 %-лан ышталтын. Медведево районысо Нурма селаште йочасад 60,5 %-лан ямде, Марий Турек районысо Сардаял школ – 38 %-лан.

Республикын чоҥымо паша, архитектур да илыме вер ден коммунал озанлык министр Михаил Степанов ден образований да науко министр Наталья Адамова «Илыме вер да оласе кумдык», «Образований», «Демографий» нацпроект-влакын илышыш кузе шыҥдаралтмышт дене палдареныт. Ойлышо-влак рашемденыт: тений республикыште чылаже 85 кумдыкым тӱзатышаш улыт. Тышеч 82 ямде.

Тений 5,57 тӱжем квадрат метр тоштемше илыме верым пужымо, 522 еҥым вес верыш илаш кусарыме.

Наталья Адамован ойлымыж почеш, 2021 ий мучаш марте 575 ясле верым ыштышаш улыт. Медведево поселкышто 825 верлан школ чоҥалтеш. Тудо 87 %-лан ямде. Контракт почеш ты учрежденийым тений ноябрьыште ыштен шуктышаш да шушаш ийын пашашке колтышаш улыт.  

Тыгак «Образований» нацпроект дене келшышын, тений 21 «Точка роста» рӱдер, региональный модельный рӱдер да «Кванториум» йоча технопарк шке омсаштым почыныт. Ялысе 5 школышто спортзалым капитально олмыктеныт да спорт оборудованийла дене пойдареныт. Тыгак педпашаеҥ-влакын профмастарлыкыштым куштымо рӱдер ден «IT-куб» кок цифровой образований рӱдер ышталтыныт.

Марий Эл вуйлатыше нацпроект-влаклан ойыралтше оксам кучылтмым утларак эскераш кӱлмӧ нерген ойлен. Иктаж объект жапыштыже ышталт огеш  шукталт гын, тидлан посна еҥ-влак персонально мутым кучаш тӱҥалыт манын каласен. Тыгак Александр Евстифеев 2022 ий 1 март марте 2022 ийысе лимит-влак дене сатум кондымо, пашам шуктымо да услугым пуымо йодыш-влак дене кугыжаныш да муниципал контракт-влакым ыштыме шотышто пашам мучашлаш кӱштен.