Марий Элым вуйлатышын пашажым жаплан шуктышын пунчалже дене республикыште IT-отрасльым вияҥдыме шотышто совет ышталтеш да ты пашам писемдыме корно палемдалтеш.
Тыгай пунчалым Юрий Зайцев IT-компаний-влакын вуйлатышышт дене вашлиймаш деч вара луктын. Вашлиймаш увер технологий рынкын ик кугу представительже iSpring компанийын офисыштыже эртен. Марий Эл вуйлатышын пашажым жаплан шуктышо палемден: IT-индустрий регионысо экономикыште вӱдышылан шотлалтеш да элысе промышленностьым писын вияҥдаш полшен кертеш.
Тудын ойлымыж почеш, тений мартыште «Российысе радиоэлектронике кластер» проектым Марий Элыште шукташ 18,4 миллиард теҥге ойыралтын. Тидыже Российысе микроэлектронике рынкын вес элын шинчашкыже ончымо деч кораҥ толмашке виктаралтше проект акын пелыже утла лиеш.
Йошкар-Олаште «Софт ПС» ассоциаций ышталтын, тушко 7 компаний пура. Вуйлатыше-влак ик ой дене палемденыт: IT-индустрийым вияҥдыме шот дене Марий Элым моло регион ден элыштат мелын ончат, но решатлышаш йодыш шагал огыл.
Ик йодышыжо специалист-влакым ямдылыме дене кылдалтын. Нунын ситыдымыштак отрасль вияҥмым чаракла. Кажне организаций шке корныжым кычалаш тырша. ISpring компанийым негызлыше да вуйлатыше Юрий Усков кӱкшӧ квалификациян специалистлам ямдылыме йодышым шке ӱмбакыже налын. Тидын шотышто шуктен толмо проектше нерген ойлымыж почеш, тудо тунемме тичмаш системе шотан. Тыге iSpring негызеш «Инфотех» увер технологий лицейым, «Инфосфера» компьютер школым ыштыме. Тунемме проектын эн кугу кӱкшытшылан iSpring институт шотлалтеш. Тушто талантан самырык-влак кӱшыл образованийым да кӱлешан IT-профессийым налын кертыт. Кок у корным Козьмодемьянскыште вияҥден толыт, тушто «Паллада» парус клублан посна проект шукталташ тӱҥалеш да «Инфосфера» почылтеш.
«Трэвел Лайн Системс» ООО унагудо бизнеслан IT-продуктым ямдылыме шотышто Российысе ик эн кугу компанийлан шотлалтеш. Тудын генеральный директоржо Александр Галочкин шке пашаче ешыжын сеҥымашыж дене палдарен да кушмаште шукыжо кадр дене кылдалтмым палемден.
Бизнесым вияҥдыме планышт дене тыгак «МОНЕТА» НКО правлений председатель, «Российын лидерже-влак» конкурсышто сеҥыше Ирина Кугуелова, «Эй-Си-Ай Ворлдвайд Раша» ООО генеральный директорын алмаштышыже Павел Муреев, «1С-Рарус Йошкар-Ола» ООО-н генеральный директоржо Денис Шемчук палдареныт.
Вашлиймаште лийше-влак IT-технологий сферысе специалист-влаклан грант полышым пуымо нерген йодышым нӧлталыныт. Тыгай профессийым налшашлан да профессионально куштышашлан IT-специалист-влакым ямдылыше рӱдер-влаклан кугыжаныш полышым пуымо мерым палемдаш темлыме.
Марий Эл вуйлатышын пашажым жаплан шуктышо ты кӱлешлыклан грантым республикын бюджетше гыч ойырымо нерген йодышым ончен лекташ кӱштен. Вашлиймаште тыгак IT-отрасльысе организаций-влаклан налог ставкым иземдыме, ты сферысе аккредитоватлыме организаций-влакын пашаеҥыштлан льготан илыме вер кредитым пуымо да моло кӱлешан йодышым ончымо.
Марий Эл Республикым вуйлатышын организаций да аналитике виктемжын уверже негызеш Ю.Исаков ямдылен
