Федеральный проект дене келшышын, Йошкар-Оласе кум объектыште пашам тӱҥалмек, подрядчикын айда-йӧра ыштымыжлан кӧра, жаплан кӱрылтыш лие. Кызыт чаракым кораҥдыме. Марий паркым ыштыме, Яналов уремысе кӱртньыгорно пашаеҥ-влакын скверыштым олмыктымо да Дружба уремысе 77-ше №-ан пӧрт кумдыкым тӱзатыме паша умбакыже шуйна.
Йошкар-Оласе кӱртньыгорно вокзал кумдык шотышто ойлымыж годым Йошкар-Ола мэрын икымше алмаштышыже Лев Покровский палемден: Марий Эл правительствын, Транспорт да корно озанлык ден Чоҥымо, архитектур да ЖКХ министерстве-влакын, Йошкар-Ола администрацийын пашам пырля келыштарен виктарымыштлан кӧра иканаште кок проект илышыш шыҥдаралтеш. Тиде «Сай качестван лӱдыкшыдымӧ корно» (Яналов уремым олмыктымаш) да «Оласе средам йӧнаным ыштымаш» (кӱртньыгорно пашаеҥ-влакын скверыштым тӱзатымаш). Эсогыл 2024 ийлан палемдыме планым ончылтымо.
Подрядчик пашам сентябрьын икымше кечылаштыжак тӱҥалын, икмыняр ужашыжым ыштен шуктен: тошто бортовой кӱ-шамычым кораҥдылыныт да олмешыже кызыт весым оптат, тысе электромеҥге-влакым кораҥдыме деч вара весым шогалташ ямдылат, паша кайыме жаплан троллейбус кудалыштме линийым кусареныт. Тошто автовокзал велым Яналов уремыште брусчаткым шарат.
Возенна ыле, кӱртньыгорно вокзал кумдыкышто постаментыште тошто паровоз (снимкыште) памятник семын шогаш тӱҥалеш. Тудым вашке конден шуктат. Кызыт фундаметлан котлованым кӱнчат. «Паровозым постаментыш кӱзыкташ жаплан лӱмын кӱртньыгорным пыштена, вара кораҥдена», – умылтарен Л.Покровский.
Дружба уремысе 77-ше №-ан шуко пачеран пӧрт кумдыкым ончалаш гын, тыште паша тӱрыснек шукталтын манаш лиеш. Проезд ден тротуарлаште корно шартышым уэмдыме, Транспортный урем велым автомашина кудал пурымо корныш асфальтым пыштыме. «Ола» предприятийын пашаеҥже-влак газоным тӱзатат.
Л.СЕМЕНОВА
