Марий Эл Республикым вуйлатыше Юрий Зайцев Кугыжаныш национальный политике шотышто концепцийым шуктымо шумлык првительственный комиссийын заседанийжым эртарен. Тушто йот граждан да Россий Федерацийын гражданствыжым налше еҥ-влаклан мемнан элысе социально-культурный илышлан келыштаралташышт да тушко ушнашышт условийым ыштыме йодышым каҥашыме.
МВД-н увертарымыж почеш, мемнан дене 183 еҥ миграционный учётышто шога. Республикыш тӱҥ шотышто Индий, Узбекистан, Таджикистан, Азербайджан, Туркмений, Украин гыч толыныт.
Марий Эл МВД йот граждан ден гражданствыдыме еҥ-влак велым ышталтше административный правонарушенийым пален налме да тыгай правонарушений лийын кертме лӱдыкшым ончылгоч кораҥдыме шумлык кӱрылтде пашам ышта.
Юрий Зайцев республикыш толшо йот граждан-влакын шкем кучымыштым, наций да конфессий-влак кокласе кылым утларак сайын эскерен шогаш, конфликт ылыжын кертме лӱдыкшым ончылгочак кораҥдаш кӱлмым палемден.
Правительственный комиссийын заседанийыштыже тыгак республикыште Россий Федерацийын Кугыжаныш национальный политикыжын стратегийжым шуктен толмо пашам иктешленыт.
Марий Эл Республик правительстве председательын алмаштышыже – Марий Эл Республикын тӱвыра, савыктыш да калык паша министрже Константин Иванов россий нацийын чак чумырген шогымыжым пеҥгыдемдымашке, наций-влак да конфессий-влак коклаште келшен да сӧрасен илаш йӧным ыштымашке виктаралтше мероприятийлам эртарыше тӱҥ операторлан республикын национальный культур рӱдерже ден калык творчестве да культурно-досуговый паша шотышто научно-методический рӱдер шотлалтыт манын каласен.
Калык-влакын келшымаш пӧртыштым да Национальный культур-влакын пӧртыштым 2023 ийыште почмо. Нуно Россий Федерацийын кугыжаныш национальный политикыжын задачыжым шуктымо йӧным кумдаҥдаш корным почыт.
Заседанийыште Марий Эл Республикын Кугыжаныш национальный политике концепцийжым шуктымо шумлык правительственный комиссийын шушаш ийыште ыштышаш паша планжым пеҥгыдемдыме.
Каҥашымашым иктешлышыжла, Марий Элым вуйлатыше республике кумдыкышто экстремизм койыш палдырнен кертмо шумлык лӱдыкшым ончылгоч кораҥдыме да наций-влак кокласе кылым саемдыме шотышто ятыр порученийым пуэн.
Марий Эл Республикым вуйлатышын администрацийжын информаций паша пӧлкажын уверже негызеш П.Шакиров ямдылен
