Паша лектыш куандара

Марий Эл вуйлатыше Александр Евстифеев Москваште Транспорт арня дене келшышын эртыше мероприятий-влакын – XIII тӱнямбал форумын да «Российын транспортшо» выставкын – пашашкышт ушнен.

Кушкыжмын Россий транспорт министр Евгений Дитрих дене элын транспорт инфраструктуыжым вияҥдаш виктаралтше нацпроект-влакым илышыш пуртымо шотышто пӱсӧ йодышлам каҥашеныт. Нацпроект-влакым илышыш шыҥдараш 2024 ий марте 7 трлн.  теҥгем кучылташ палемдалтеш, тылеч пелыже – инвестор-влакын оксашт. Российыште магистраль-влакым шарыме да уэмдыме шотышто комплексный планым приниматленыт. Тудын транспорт дене кылдалтше ужашышкыже 9 федеральный проект пурталтын. Нуно эрвел-касвел да йӱдвел-кечывалвел транспорт коридор-влакым вияҥдаш виктаралтыныт.

Форум жапыштак «ЭРА-ГЛОНАСС: айдемылан, бизнеслан, кугыжанышлан технологий» пленарный заседаний лийын. «ЭРА-ГЛОНАСС» Тӱнямбал Конгресс транспорт лӱдыкшыдымылыкым кугемдыме, интеллектуальный транспорт системым ыштыме шотышто опыт дене ваш-ваш палдарыме дискуссий площадке-влак кокла гыч Российыште улшо иктыжлан шотлалтеш. Сандене форумын участникше-влак тиде системым ончыкыжым кузе вияҥдаш, корнылаште лӱдыкшыдымылыкым ышташ лиймым, молым каҥашеныт.

Тиде кечынак отраслевой конференций эртаралтын. Тушто «Лӱдыкшыдымӧ да сай качестван автомобиль корно» нацпроектым илышыш пуртымо теме эн тӱҥ лийын.

Евгений Дитрихын палдарымыж почеш, корно дене кылдалтше нацпроектым илышыш пуртымын лектышыже куандарыше: Россий мучко тений гына 12930 километр корным тӧрлымӧ да шотыш кондымо.

Конференцийын участникше-шамыч лектышышт да кӱкшытышт, Россий президентын майысе указыштыже палемдыме цельышке шумаште вашлиялтше нелылык-влак нерген каласкаленыт.

- Мемнан республиклан тиде – исторический тат. Ме моткочак сайын, эсогыл ончылтен пашам ыштенна. Тидым посна еҥ да пашаче коллектив-влак деч пурышо тауштымаш-влак пеҥгыдемдат. Нуно корным шотыш кондымо да тудын качествыж дене кылдалтше йодыш шотышто республик «верже гыч тарванен» манын палемдат. Корным тӧрлымӧ паша кызытат кугу куат дене шукталтеш да ончыкыжым эшеат чотрак ышталташ тӱҥалеш, - каласен Александр Евстифеев.

Тыгак тудо республикын правительствыжын кӱлешан задачыж нерген – Йошкар-Ола – Нижний Новгород корным федеральный веденийыш пуымо нерген – ойлен.

- Тиде мыланна корно фонд оксам вес участкылаште кучылташ йӧным пуа, - палемден тудо.

Тыгак каласен: мероприятийыште могай йодыш шотышто мом мутланен келшеныт гын, чылажат республикыште кучылталташ тӱҥалеш.