Паша группым чумыраш кӱштен

Ушештарена, тиде кечылаште регионым вуйлатыше Россий Госсовет Президиумын да Президент пелен науко да образований шотышто Советын кумдаҥдыме заседанийыштышт лийын.

«Тушто ик эн кумдан вузыш тунемаш пуртымо контрольный цифрым ыштыме шотышто у йӧн нерген каҥашыме. Умылена, чыла регионыштыжак тыгай тунемме вер кӱлеш наре уке, санденак преподаватель-влакым ямдылыме дене кылдалтше йодышым тарватыме. Тыгак шанче пашаеҥ-шамычым ямдылыме шотыштат мутланыме, молан манаш гын кызыт улшо специальность-шамычын квалификацийышт аҥысыр. Заседанийыште лийше шанчыеҥ-влак у шинчаончалтыш кӱлеш манын ойленыт… Икманаш, йодыш шуко. Лишыл жапыште элын экономикыжлан кӱлешан специалист-влакым ямдылыме шотышто Россий президентын кӱштымыжым шуктышаш улына. Тидлан мемнан республиклан келшыше направленийлам шымлыман, тӱрлӧ кӱкшытыштӧ каҥашымашлам эртарыман. Эн ончычак мый студент да ача-ава, шанчыеҥ-влакын шонымашыштым палынем. Специалист-шамыч деч посна социальный сферым, экономикым вияҥдаш огеш лий», – каласен Александр Евстифеев.

Юл кундем кугыжаныш технологий университетыште ректорын пашажым жаплан шуктышо Игорь Петуховын мутшо почеш, тачысе кечылан ик эн кӱлешан пашаеҥ-влакым ямдылыме пашаш вуз кумылын ушна. «Мемнан кундем талантан самырык еҥ-влаклан поян, сандене нунылан тунемаш да умбакыже республикыштак тыршаш йӧн лийшаш», – манын тудо.  Марий кугыжаныш университетын ректоржо Михаил Швецов тыге каласен: «Республикысе районлаште таче могай специалист кӱлеш, мыняр – эн ончыч тидым пален налман. Вуз ден регионысо ик эн ончыл компаний-влак коклаште кыл лийшаш. Кӱшыл профессионал образованийым пуышо вер пелен мемнан университет семын инжиниринг классым почман. Тунам школ – университет – предприятий кыл виян лиеш».