20 декабрьыште Москваште Российысе законодатель-влакын советыштын заседанийже эртен. Тудо Россий Федерацийын Конституцийжылан да Федеральный Погынымашым ыштымылан 30 ий теммылан пӧлеклалтын. Тушто Марий Эл Республик Кугыжаныш Погынын председательже Анатолий Смирнов участвоватлен.
Погынышо-влак ончылно РФ-ын президентше Владимир Путин ойлен. Тудо сенатор, Кугыжаныш Думын депутатше, регионласе законодатель-влакым парламентын да Российын историйыштыже чапле лӱмгече дене саламлен. Кугыжанышым вуйлатыше чылаштым социальный обязательстве, элын суверенитетше да лӱдыкшыдымылыкшӧ шотышто пунчал-влакым жапыштыже лукмылан, тӱнямбал площадкылаште чулымын тыршымылан тауштен да федеральный ден региональный парламент-влак утларак профессионально пашам ышташ тӱҥалмыштым палемден. Путин тыгак СВО-н участникше-влаклан да нунын ешыштлан полшен шогымо нерген пеш кӱлешан закон-шамычым юватылде лукмым ушештарен да ты пашам умбакыже шуяш темлен.
Федераций Советын председательже Валентина Матвиенко Российын конституционный тӱҥ негызше-влак коклаште рӱдӧ верым элын федераций семын ышталтмыже налын шога манын палемден. Владимир Путинын Россий президентын должностьышкыжо уэш сайлалташ келшымыже мучашке лишемше ийыште тӱҥ политический событийлан шотлалтеш, каласен парламентын кӱшыл палатыжым вуйлатыше.
Кугыжаныш Думын председательже Вячеслав Володин президентын у сроклан кандидат семын ойыралташ келшымыже мемнан калыклан, тыныслын илаш шонышо тӱнямбал сообществылан пеш кӱлешан манын.
Марий Эл Республик Кугыжаныш Погынын председательже Анатолий Смирнов Законодатель-влакын советыштын заседанийжым иктешыжла, президент Владимир Путинын, Федеральный Погынымашын кок палатыжым вуйлатыше-влакын шындыме задачыштлан тӱткышым ойырен. Эн ончыч тӧрлышаш задачылан СВО-н участникше-влаклан полшен шогымаш, элын аралат кертме йӧнжым кугемдымаш шотлалтеш манын. Анатолий Васильевич тыгак парламентарий-влакын пашаштым президентын кӱкшын аклымыжым палемден.
Марий Эл Республикым вуйлатышын администрацийжын информаций паша пӧлкажын уверже негызеш П.Шакиров ямдылен
