«Паллада» дене – тўня йыр

Тўня йыр парусник-влак дене коштын савырныме экспедицийын икымше йыжыҥжын участникше – Козьмодемьянск олаште патриотизм шўлышеш шуарен куштымо зональный рўдерын еҥже – «Паллада» парусный клубын членже-влак вуйлатыше Андрей Желудкин ден кугырак юнга Роман Михеев тиде кечылаште Марий Элыш пӧртылыныт. Нуно «Паллада» учебный судно дене Тихий океан гоч ийын эртымаште лийыныт.

25 февральыште нуно Марий Элым вуйлатыше Александр Евстифеев дене вашлийыныт да экспедицийыште лийме жапыште ужмо-колмышт нерген каласкаленыт. Экспедиций 2019 ий 1 ноябрьыште Владивосток гыч кужу корныш тарванен. Тўня йыр коштын савырнымашке эн ончыч «Паллада» фрегат лектын. Изиш варарак – 2019 ий 7 декабрьыште – Калининград гыч «Седов» ден «Крузенштерн» барк-влак тарваненыт.

Икымше этапын маршрутшо Апиа (Самоа), Папеэти (Француз Полинезий, Таити остров), Вальпараисо (Чили), Ушуайя (Аргентина) гоч, Япон теҥыз да Тихий океан гоч эртен. Чылаже 23 тўжем километр шеҥгелан кодын. Чыла тиде жапыште Марий Элын флагше да республикыште налме мландан чондай «Палладын» бортыштыжо лийыныт. Республикын представительже-влаклан нуныжым корныш лекме деч ончыч  Марий Эл правительствыште кучыктеныт. Теҥыз портлаште судно мучко экскурсийым эртарыме годым еҥ-влак Марий Элын информационный стендше дене палыме лийын кертыныт.

Шерге таҥ-влак, мый тендам тыгай походышто лиймыда дене куанен саламлем. Республикыште илыше еҥ-влак кокла гыч Горн мыс воктеч парус дене ийын эрташ иктыланат логалын огыл, очыни. «Паллада» фрегат кызыт умбакыже ийын коштеш, тудын бортыштыжо Марий Эл Республикын мландыже ден флагше улыт. Тиде – пеш сай, пеш кўлешан событий. Флаг нерген ойлаш гын, тўня йыр путешествий пытыме деч вара тудын дене кузе лийшашым шке рашемдыза, но иктым каласем: республикысе музей-влак нине экспонатым налаш да аралаш ямде улыт. Республик тендан дене кугешна, каласен Александр Евстифеев тўня йыр коштын савырныме экспедицийын участникше-влакым саламлен ойлымыж годым.

Андрей Желудкинын мутшо почеш, кумдан палыме парусникыште 88 практикант – Росрыболовствын тўҥ учебный заведенийыштыже тунемше курсант-влак да ныл самырык моряк лийыныт. Самырык моряк-влакше школышто да Марий Элысе, Крым Республикысе, Ярославль оласе да Хант-Манси автономный округысо теҥыз клублаште тунемыт.