Оперативный совещанийыште Марий Эл вуйлатышын пашажым жаплан шуктышо Юрий Зайцев еҥ-влакын диспансеризацийым эртыме йодышлан посна кугу тӱткышым ойыраш задачым шынден.
«Тазалык кечын, йӧн уло гын, скринигым ышташ кӱлеш. Вес вариант уке. Онкологий черым тӱҥалтыштак пален налман», – каласен тудо.
Республикын Тазалык аралтыш министрже Марина Панькован мутшо почеш, вӱргорно дене кылдалтше чер деч вара онкологий дене колымаш кокымшо верыште шога. 2021 ийыште черым пален налме показатель Российысе деч изирак. Докладыште каласыме, республикыште коваште – 14%, шӧр ту – 11,7%, пуалме чер, ӱдырамаш орган рак –9,4%, кукшылогар, бронх-влак, шодо – 9,9%, пагар – 7,3 %, предстательный ту – 6,1% колоректальный рак – 13,8%, моло верла – 27,8% рак утларак палдыранат.
«Тазалыкым аралымаш» нацпроектын «Онкологий чер-влак дене кучедалмаш» региональный программым Марий Элыште илышыш шыҥдараш 2019 гыч 2024 ий марте 7,2 млрд. теҥге ойыралтеш, тышеч 658,7 млн. теҥге федеральный , 40,6 млн. теҥге республиканский бюджетла гыч, 6,5 млрд. теҥге – обязательный медицине страхованийын средстваже. 2022 ийлан 1,2 млрд. теҥгем ойыраш палемдыме, ойлен министр.
2019-2021 ийлаште «Тазалыкым аралымаш» нацпроект кӱшеш кызытсе йодмашлан келшыше сай технологиян 54медицине оборудованийым пашаш колтымо. Тений Республикысе онкологий диспансерыште, Республикысе клинике да Йошкар-Оласе больницылаште 8 у оборудованийым шындат.
Тылеч посна Марина Панькова вес уверымат каласен. Онкологий черым чараклаш Республикысе онкологий диспансерын поликлиникыже полшен кертеш. Тыгай поликлиникым чоҥымо проект да смете документаций кугыжаныш экспертизым эртен, РФ Тазалык аралтыш министерстве федеральный адресный инвестиций программыш пурташ кӧнен, кызыт Российын Экономике ден Чоҥымо министерствылаште кагаз паша кая.
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
