Марий Эл вуйлатышын пашажым жаплан шуктышо Юрий Зайцев Шуко профилян лицей-интернатыште почмо Уста йоча-влак дене пашам ыштыме республик рӱдерыште лийын.
Кызыт тушко уло кундемна гыч всероссийский олимпиадыште да моло конкурсышто сеҥыше да призёр-влак – чылаже 115 еҥ – кеҥежымсе «УмКа» лагерьыш чумыргеныт. Юрий Зайцев химик ден физик-шамычын отрядлаштышт эртыше практике занятийлаште лийын, биолог-влакын шымлымыштым ончен, ӱдыр-рвезе да туныктышо-шамыч дене мутланен.
«Тунемшым олимпиадылан лицейыште пашам ыштыше педагог-шамычын авторский учебникышт почеш ямдылена. Тӱҥ пашана – йоча-влакым тунемаш кумылаҥдаш. Тек нуно варажымат олимпиаде толкынын чолга участникше лийыт», – каласен лицейым вуйлатыше Марина Даниарова.
Рӱдерын технический могырым виян улмыжым Марий Эл вуйлатышын пашажым жаплан шуктышо кӱкшын аклен.
«Тыште тӱрлӧ конкурсышто, олимпиадыште сеҥыше-влак улыт, нуно вступительный экзаменым сайын кучат, илышыште шке цельышт уло. Рӱдерыште ӱдыр-рвезе-влакым туныктымо годым практикылан кугу верым ойырат, тидыже мылам поснак келшыш», – каласен Юрий Зайцев.
Тудо йоча-влак дене пашам ыштыше педагог-шамычлан тауштен да палемден: Марий Эл гыч команде всероссийский олимпиадыште ончыл радамыште лиеш манын ӱшан уло.
Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен