Таче, 4 апрельыште, Йошкар-Олаште Марий Элын Мер полыш штабыштыже республикысе Кугыжаныш Погыныш «Единый Россий» партий деч депутат-влакым сайлышашлан кандидатур-влак шотышто ончылгоч йӱклымашым эртарыме нерген Марий организационный комитетын черетан заседанийже лийын.
Партийын Марий региональный отделенийжын секретарьже Евгений Кузьмин палемден: ончылгоч йӱклымаш республикыште сайын тӱҥалын.
– Шушаш сайлымашке «Единый Россий» партий эн келшен толшо да конкуренцийым ыштен кертше кандидат-влакым гына темла. Ончылгоч йӱклымашым ме республикыште илыше-влакын лачшымак кӧлан эн чот ӱшанымыштым пален налаш шонен эртарена. 15 ий жапыште «Единый Россий» элыштына улыжат ик политический партий, кудыжо сайлымаш кампаний тӱҥалме деч ончычак шке кандидатше-влакым тыгай йӧн дене публично ойырен налеш.
27 март гыч 4 апрель марте региональный оргкомитетыш республикыште илыше чолга еҥ-влак деч 50 утла йодмаш пурен. Ушештарем: 25 апрель марте кумылан кажне еҥ ончылгоч йӱклымашын участникше лийын кертеш,– каласен Евгений Кузьмин.
Тиде йӱклымашке ушнымын кӱлешлыкшым Ренат Магсумоват палемден.
– Специальный военный операцийыште мемнан элна кумшо ий участвоватла. «Защитники Отечества» фондышто пашам ыштымаш – тиде шке калыклан, участник ден СВО-н ветеранже-влаклан служитлымаш. Мемнан регионышто илыше-влак ончылгоч йӱклымаште, а вара сайлымаштат мыйын кандидатурем ойырен налыт гын, тауштем. Марий Эл Республикын Кугыжаныш Погынжын депутатше лиймеке, нунын улшо неле йодышыштым писын да кӱлеш семын решатлен кертам ыле, – ойлен тудо.
«Единый Россий» партийын праймеризышкыже ушнаш документым ик эн ончыч Наталья Козлова пуэн.
– Республикысе Кугыжаныш Погынын депутатше семын моло задаче дене пырля мый эше Марий Элын Молодежный парламентше дене пеҥгыде вашкылым ыштен пашам шуктем. Самырык-влак дене пашам умбакыжат шуйынем. Еҥ-влак мыйын кандидатурем поддержатлат шонем, – палемден Наталья Николаевна.
Ушештарена: «Единый Россий» партийын ончылгоч йӱклымашкыже ушнаш документым 25 апрель марте пуыман. Тушко ушнышашлан избиратель-шамыч 15 апрель гыч регистрироватлалт кертыт. Йӱклымаш ик арня, 20 гыч 26 май марте, шуйна.
Л. Камалетдинова
