Ончыл радамыште

Медведево районысо «Семёновский» племзавод» ЗАО 60 ияш лўмгечыжым палемден. Предприятийын пашаеҥже-влакым чапле юбилей дене Марий Элым вуйлатыше Александр Евстифеев саламлен.

«60 ий – организацийын эртыме корныжым иктешлаш, предприятийым вияҥдымашке надырыштым пыштыше пашаеҥ-влакын лўмыштым шарналташ келшыше йӧн. Озанлыкын историйжым шымлаш гын, тудын нерген «ончыл», «икымше», «эн сай» мут-влак гына йоҥгат», - каласен республикым вуйлатыше.

Пытартыш кумло ий жапыште озанлыкын пашаеҥже-влак ялозанлык культурым ончен куштымаште, вольыкын продуктивностьшым кугемдымаште эн сай лектышыш шуыт. Тышкыже чын вуйлатен моштымылан, пашаче коллективын тыршымыжлан, жаплан келшыше технологийлан эҥертымыжлан кӧра шумо. Таче племзавод кургым ямдылыме гыч тўҥалын, ямде продукцийым лукмо, кевытлашке ужатыме марте тичмаш цикл почеш тырша. Кызыт тыште 42 тўрлӧ сатум луктыт. 2019 ийлан тўкан шолдыра вольыкшо 7,7 тўжем вуй лийын, тышечын 3,5 тўжемже – ушкал. Чумыржо 27,8 тўжем тонн шӧрым ыштен налын. Пўтынь республикыште ямдылыме шӧр гыч тидыже 16 процент лиеш. Кажне ушкал деч кокла шот дене 8419 килограмм шӧрым лўштен. Тылеч посна племзаводын имне фермыже уло, туштат сай урлык вольыкым шарыме пашам сайын шукта.

Марий Эл вуйлатыше Александр Евстифеев Владимир Путинын ял илышын качествыжым умбакыже саемдаш кўлмӧ шотышто позицийжым ушештарен. «Аграрий, ял кундем-влакын шке, посна профильный нацпроектышт уке, Туге гынат нунын интересышт кажне проектыште шотыш налалтшаш улыт. Вара регион вуйлатыше Медведево районышто «Демографий» нацпроект почеш мо ышталтме, ончыкыжым мом ышташ палемдыме нерген ойлен.

 Племзаводын лектышыже пашам кузе ышташ кўлмӧ, традицийым аралыме, профессионал-влакын у тукымыштым воспитатлыме сай пример семын лийын кодеш. Александр Евстифеев коллективлан ончыкыжымат вияҥаш, производственный куатшым ешарен толаш тыланен. Пытартышлан предприятийын пашаеҥже-влаклан наградым кучыктен.