Россий президентын Юл кундем федерал округысо полномочный представительже Игорь Комаров, Марий Элыште паша дене коштын савырнышыжла, регионышто вияҥ толшо икмыняр отрасльым палемден, тидын шотыштак – IT-индустрийым, промышленностьым, ялозанлыкым да туризмым.
IT-индустрийлан тудо поснак кугу тӱткышым ойырен. Марий Эл ты отрасльлан кадрым ямдылыше рӱдерыш савырна манын да iSpring компанийым палемден ончыктен. Тиде компаний корпоратив тунеммашлан программым ямдыла. Штаб-квартирже Йошкар-Олаште верланен. Кызыт компанийын тӱнясе 172 элыште 60 наре тӱжем клиентше уло.
Тудым вуйлатыше Юрий Усков палемден: кадрым ямдылымылан кугу тӱткыш ойыралтеш. Республикыште тичмаш тунемме системым ыштыме. Компаний негызеш информатике ден программированийым келгын тунемме «Инфотех» лицей, «Инфосфера» компьютер школ пашам ыштат. Тунемме проектын кӱшыл ужашыжлан iSpring институт шотлалтеш, тушто талантан самырык еҥ-влак кӱшыл шинчымашым да кызытсе жапыште кӱлешан IT-профессийым налыт. Институтышто тыгак технический ден коммерческий профилян у IT-направленийлам почмо. Тӱнямбал брендлам пример шотеш ончыктен, Юрий Усков палемден: сай качестван продуктым ямдылымаш гына шагал, тудым эше моштен шӱкаш кӱлеш, институтышто тидланат тунемаш тӱҥалыт.
Вуз республикысе да моло регионысо самырык-влак коклаште палымыш савырнен, 30 процент студентше – ола деч ӧрдыж гыч. Чыла тунемше, тидын шотыштак Йошкар-Ола гыч студент-влак, жаплан келшыше тӱшкагудышто илен кертыт, тушто академический пашам виян шукташ да канаш келшыше условийым ыштыме. Компанийым вуйлатыше тунемме инфраструктурым вияҥдаш, моло регион гыч выпускник-влаклан Йошкар-Олаште тунемаш, илаш да кызытсе рынкыште кӱлешан специальностьым налаш йӧным пуаш шона.
РФ президентын Юл кундем федерал округысо полномочный представительже Игорь Комаров регионышто увер технологийым вияҥдыме сферыште шумо ошкыллан кӱкшӧ акым пуэн да тидлан полшаш кӱлмым палемден.
Марий Эл вуйлатышын пашажым жаплан шуктышо Юрий Зайцев компаний вуйлатышын чын шонымыжым палемден: тыге республикыште IT-специалистым ямдылыме шотышто студент кластер ышталтеш. Рӱдолаште веле огыл, эше кок направлений Козьмодемьянск олаште вияҥеш – «Паллада» парус клублан проект илышыш пурталтеш да «Инфосфера» почылтеш.
Тӱрыс налмаште Марий Элыште IT-отрасль икмыняр лу компанийым ушен шога, тушечын кугурак ужашыже федерал але тӱнямбал рынкыште пашам ышта. Утларак кугу компаний-влакын оборотышт икмыняр миллиард теҥгеш шуэш, да нуно писын кушкыт – идалыкыште кокла шот дене 30 процентлан. Мемнан гай изи регионлан тиде ӧрыктарыше результат.
Республикым вуйлатышын пашажым жаплан шуктышо массовый информаций средстве-влакын представительыштлан каласен: совещаний жапыште икмыняр отрасльым палемден ончыктымо, нуным вияҥдымаш ончыко ӱшанле ошкылым ышташ полша.
Марий Эл Республикым вуйлатышын организаций да аналитике виктемжын уверже негызеш Ю.Исаков ямдылен
