Республикысе кучемыште «Шап» йоча лагерь пелен тачысе жаплан келшыше тазалыкым пеҥгыдемдыме комплексым чоҥаш палемдыме нерген увертареныт.
Мут – Лёня Голиков лӱмеш ончычсо каныме верын кумдыкшо нерген. Тудо Шап ер серыште, Медведево районыш пурышо пӱнчерыште верланен. Кызыт тушто XX курымын 70-ше ийлаштыже чоҥымо ик пачашан пу оралте-шамыч шогат. Марий Эл правительстве «Туризм.РФ» корпораций дене пырля нунын олмеш йоча-влаклан кызытсе жаплан келшыше комплексым чоҥаш палемден. Тушто ик сменыштак иканаште 200 икшывылан канаш йӧн лиеш.
«Таче ме «Шап» тазалыкым пеҥгыдемдыме комплекс» кугыжаныш унитарный предприятийым уэмден вияҥдыме шотышто совещенийым эрптарена. Тудо кызыт Пӱртӱс ресурс, экологий да йырым-йырысе кумдыкым аралыме министерствынлан шотлалтеш», – паша вашлиймашым тӱҥалмыж годым каласен Марий Элым вуйлатышын пашажым жаплан шуктышо Юрий Зайцев.
Республикын молодёжь политике, спорт да туризм министрже Лидия Батюкован каласкалымыж почеш, палемдыме йоча лагерьын инфраструктуржым уэмдыме паша «Туризм да унам ончымо индустрий» национальный проектын кышкарыштыже эртаралташ тӱҥалеш.
Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен
