Марий Эл вуйлатыше Юрий Зайцев «Йошкар-Оласе 1-ше ТЭЦ» АО-што лийын да олтымо сезон кузе эртыме шотышто совещанийым эртарен.
Регион вуйлатыше ушештарен: Россий президент Владимир Путин энергетике инфраструктурын пайдалыкшым кугемдыме да экономикын йодмашыжлан энергокуатым ситарыме задачым шынден. Да предприятийын тидым шуктен толмыжым палемден.
«Йошкар-Оласе 1-ше ТЭЦ» АО-н генеральный директоржын сомылжым шуктышо Сергей Сивохин олтымо сезон кузе эртыме нерген увертарен. Тудын ойлымыж почеш, шокшо норматив дене келшышын да ситышын пуалтеш. Чот йӱштыштат предприятий кӱрылтыш деч посна ыштен. Олтымо сезон жапыште электросетьыште тул йӧрталтмаш 14 процентлан шагалемын, а йӧрталтме жап – 24 процентлан.
Предприятий вуйлатыше ешарен: 2023 ийыште 299,5 миллион теҥгеаш инвестиций программе шукталтын. Тыге 37-ше №-ан котельный кумдыкышто газопоршневой электростанций чоҥалтын, К.Маркс ден Киров уремлаште магистраль теплосеть пужен ышталтын, Кожино подстанцийын оборудованийжым уэмдыме пашам умбакыже шуйымо.
Марий Эл вуйлатышын пресс-службыжын уверже негызеш Ю.ИСАКОВ ямдылен
