Марий Эл вуйлатыше Юрий Зайцев олмыктымо деч вара Параньга районысо социальный объект-влакым ончен савырнен.
Эн ончыч тудо районысо рӱдӧ эмлымверыште лийын. Тудым капитально олмыкташ республикын бюджетше гыч 21 миллион теҥгем ойырымо. Поликлиникын оралтыштыже подрядчик вӱдым ситарыме, ырыктыме, канализаций, электробрудований системе ден пӧлем-влакым уэмден олмыктен, чыла окнам, омсам вашталтен. Кызыт тушко вераҥдышашлык оборудований ден мебельым налыт.
Поликлиникыште общий, тыгак аҥысыр специализациян медик-влакат ситышын улыт. Тидын нерген регион вуйлатышымат палдареныт.
«Мыланна эн тӱҥ – еҥ-шамычын илыш ден тазалыкыштым аралаш. Кызыт ты поликлиникыште врач-шамычлан веле огыл, тышке толшо пациент-влаланат сай условий ышталтеш», – палемден Юрий Зацйев.
Регион вуйлатыше тыгак шукерте огыл уэмден олмыктымо Параньга кыдалаш школыштат лийын. Пашажым тушто мартыште тӱҥалыныт улмаш. У туныктымо идалык тӱҥалтышлан леведышым, фасадым уэмденыт, кӱварыш шартышым, чыла омсам, инженер сетьым да пожарный сигнализацийым вашталтеныт. Тунемме кабинет-влакым кызытсе жаплан келшыше оборудований да мебель дене пойдареныт. Чыла тиде пашам Россий Президент В.Путинын темлымыж почеш илышыш шыҥдарыме образованийын школ системыжым уэмдыме шотышто федерал программе дене келшышын шуктымо.
Юрий Зайцев актовый залыште, кочмыверыште, физике ден руш йылме кабинетлаште лийын. Тудын ойлымыж почеш, школым уэмдыме шотышто федерал программылан кӧра икшыве-шамычлан сай шинчымашым налаш да усталык моштымашым вияҥдаш кызытсе жаплан келшыше условий ышталтын.
«Школ куандарыш. Кажне гана капитально олмыктымо учрежденийыш мийыме годым образований системым модернизироватлыме программын чын улмыжым умылем. Тудо тошто школ оралте-влакым олмыктымо процесслан вияҥаш полша», – каласен регион вуйлатыше.
Тидын дене пырля Юрий Зайцев школлаште патриотический воспитанийын кӱлешлыкшым палемден. «Информационный направленийын кӱлешлыкшым ончктынем. Кабинетлаште почеламут гыч налме корнылам вераҥдыме, патриотический шӱлышанат улыт. А чыла шотыштат чын гражданиным ончен куштымо пашаште ик кабинет дене гына серлагаш огеш лий. Тиде пашам эре шуктыман», – Юрий Зайцевын ойлымыжо лийын.
Тӱҥалтыш класслам туныктышо регион вуйлатышылан школым уэмден олмыкташ йӧн лиймылан тауштен да у условийыште пашам ышташ моткоч сай манын палемден.
Регион вуйлатыше ты районыш паша дене миен коштмыж почеш совещанийым эртарен. Тушто муниципал образованийын социально-экономический вияҥмашыж дене кылдалтше йодыш-влакым каҥашеныт. Тыгак посёлкысо рӱдӧ стадионным уэмдыме, школ воктенысе кумдыкым тӱзатыме да здравоохранений сферыште ыштышашлык вашталтыш нергенат мутланеныт.
Марий Эл Республикым вуйлатышын администрацийжын Информаций паша шотышто пӧлкажын уверже негызеш С.Носова ямдылен
