«Ментальный тазалык» проектым илышыш пуртымаште Марий Элын паша лектышыжым округ кӱкшытыштӧ палемденыт.
Регионышкына Россий Федераций президентын Юл кундем федеральный округышто полномочный представительжын полышкалышыже Владимир Колчин толын коштын, да Марий Эл правительстве председательын икымше алмаштышыже Михаил Васютин дене пырля «Ментальный тазалык» округысо мер проектым илышыш пуртымо шотышто совещанийым эртареныт. Тиде проект РФ президентын ПФО-што полномочный представительже Игорь Комаровын тӱҥалтышыж почеш 2019 ий гыч илышыш пурталтеш, Марий Эл тушко 2022 ийыште ушнен.
«Ментальный ситыдымашан инвалид-влаклан комплексный реабилитацийым эртарыме сфер – пеш неле теме. Пытартыш икмыняр ий Россий Федерацийын Паша да социальный аралымаш министерствыже Минздрав да Минпросвещений дене пырля пашам чолган шуктен. Вара моло институтат ушненыт. Проектым илышыш пуртымо жапыште инвалид-шамычым социально аралыме сферыште законодательствым уэмдыме, тыгак медицине полышым пуымо норматив виктарымашым шуко шотышто вашталтыме, «инвалид-влакын комплексный реабилитацийышт», «полшен илымаш» умылымаш-шамычым пуртымо, у профессий-влак лектыныт», – манын В.Колчин да проектым илышыш пуртымаште Марий Элынат тӱвыргӧ паша лектышыжым палемден, тыгак тудым эшеат саемдаш темлен.
М.Васютинын мутшо почеш, ПФО моло округ деч РФ президентын полномочный представительжын аппаратшын лу утла тӱрлӧ проектлан тӱҥалтышым ыштымыж дене ойыртемалтеш. «Ментальный тазалык» проектын задачыже аутистический спектрын пужлымыжлан кӧра орланыше кажне йоча деке шумо да тудлан шинчымашым налаш, вияҥаш чыла йӧным ыштыме дене кылдалтын. Марий Элым вуйлатышын кӱштымыж почеш палемдыме йоча-шамычлан комплексно полшымо концепцийым ямдылыме, ведомство-влак кокласе пашаче группым чумырымо да проектым илышыш пуртымо радамым ыштыме.
Республикыштына аутистический спектрын пужлымыжлан кӧра орланыше йоча-влакым воспитатлыше да туныктышо, инвалид йочам ончышо еш-шамычлан полшышо специалист-влакым ямдылымылан кугу тӱткыш ойыралтеш. Ӱмаште тазалык аралтыш, социальный аралымаш, образований да калыклан пашам ситарыме сферла гыч 160 специалист «Ментальный тазалык аланыште специалист-влаклан шинчымашым пуымо площадке – Приоритет 2030» проектын кышкарыштыже келшыше шинчымашым налын.
Педиатрический службо ик ияш марте ийготан йоча-влакын нервышт ден психикыштым тылзе еда терга, 1-2 ияш-шамычыным – кажне кварталыште.
Аутистический спектрын пужлымыжлан кӧра орланыше йоча-влак школ деч ончычсо шинчымашым пуымо организацийлашке огыт кошт гын, изиланак полшышо службылан эҥертен кертыт.
Марий Элым вуйлатышын пресс-службыжын уверже негызеш М.Иванова ямдылен
