Юрий Зайцевым Марий Эл вуйлатыше должностьыш кандидат семын регистрироватленыт. Тыгай пунчалым 2 августышто республикын Рӱдӧ сайлымаш комиссийжын черетан заседанийыштыже луктыч.
Тылеч ончыч тудо муниципальный фильтр манмым эртен. Тидлан шкеж верч 129 лист кидпалым поген. Тышеч 33 листше – районласе да олаласе депутат-влакын погынымашышт деч депутат-влак деч. Палемдыме почеш, тидыже кӱлмӧ деч шукырак.
Тыгак Юрий Зайцев республикын ЦИК-ышкыже избиратель-шамыч деч 5852 кидпалым погымо 1171 листым конден. Закон дене келшышын, нунын кокла гыч 20 процент кидпалым (1064) тергаш ойырен налыныт. Тушеч 12 подписьым действительный огыллан шотленыт.
Тылеч посна кандидат нерген тӱрлӧ сведенийым: образованийжым, Россий гражданствыже улмым, доход кушеч толмым, тыгак счетшо, вкладше, шергакан кагазше нерген – тергеныт. Чыла фактым чынлан шотлымо, палдарышт заседанийыште.
Тылеч вара Марий Элын Рӱдӧ сайлымаш комиссийжын председательже Ирина Татаринова Юрий Зайцевлан регистраций нерген удостоверенийым кучыктыш да тыланымашым ойлыш.
* * *
Эрлашыжым республикын ЦИК-шын 24-ше заседанийже лийын. Тушто Марий Эл вуйлатышын должностьышкыжо моло кандидат-влаклан председатель Ирина Татаринова регистраций нерген удостоверенийым кучыктен.
Тиде – Валентина Злобиналан («Партия пенсионеров»), Антон Мирбадалевлан (ЛДПР) да Наталия Глущенколан («Справедливая Россия – Патриоты – за правду»). Визымше кандидат Василий Арисов ты радам гыч кораҥдалтын. Молан манаш гын регистрацийлан кӱлшӧ документ-влакым палемдыме жапыште пуэн шуктен огыл.
* * *
Вӱргечынак Ирина Татаринова правительстве пӧртыштӧ журналист-влак дене вашлийын. Тушто тудо избирательный кампанийын черетан йыжыҥже мучашлалтме нерген каласкален.
Любовь Камалетдинова
Фотом Марий Эл ЦИК-ын соцкылысе лаштыкше гыч налме Z/Камалетдинова/фото вручение Зайцеву
