Нунын тыршымыштлан кӧрат илышна ласка

- Пӱтынь элна семынак Марий Эл – полиэтничный да поликонфессиональный. Тӱрлӧ религийын представительже да калык-влак коклаште тыныслык ден келшымаш регионлан вияҥаш полшышо ик эн кӱлешан условий. Ты шотышто мемнан дене сӱрет сай. Тыште, мутат уке, тендан надырда кугу. Кызыт, кунам Россий президентын темлымыж почеш национальный проект-влак республикыште илышыш пурталтыт, тендан тӱткышда поснак кӱлешан, - каласен Александр Евстифеев.

Россий ФСБ-н Марий Элысе управленийжын пашаеҥже-влакын шуко еҥ ушныман мероприятийлаште тыршымыштым поснак палемден. Тиде, эн ончычак -  Инвалид-влакын III всероссийский кеҥеж спартакиадышт, Сеҥымашын 74-ше идалыкшым пайремлымаш, Кугыжаныш Погыныш сайлымаш. Чылажат утларакше кугыжаныш безопасность орган-влакын тыршымыштлан кӧра туткар да азап-влак деч посна эртен, каласен Марий Эл вуйлатыше.