Начарын огыл ямдылалтме

Тыгай шонымашым ойлен тенийсе шошо ага пашам эртарен колташ  ямдылалтмылан пєлеклалтше совещанийым почшыжлаМарий Эл Республик правительстве председательын икымше алмаштышыже С.Сметанин.

Тушто Марий Эл правительстве член, Ялозанлык да продовольствий министерствын, муниципал образованийын, тыгак ялозанлык техникым ямдылыше компаний ден поставщик-влакын еҥышт лийыныт. Мероприятий Марий кугыжаныш университетын Пашаче рўдерыштыже эртен.

С.Сметанин совещаний тўҥалме деч ончыч университетын оралтыж ончылан «Ростсельмаш» заводын вераҥдыме экспозицийжым ончен лектын. Тушто шурным погымо да кургым ямдылыме комбайн-влакым ончыктымо. Тидым палемдыман: тиде предприятийын еҥже-влак дене республикын правительствыжын членже-влак икымше гана веле огыл вашлийыныт. Тений янарьыште Марий Эл вуйлатыше А.Евстифеев завод вуйлатыше-влак дене мутланен, регионын ялозанлыкшылан кадрым ямдылымаште компанийын участвоватлымыж шотышто кутырен келшен. МарГУ-н данныйже почеш, кызыт университетын 50 преподавательже ден студентше Ростов-на-Дону олаште улыт. Тушто нуно кызытсе технике дене палыме лийыт, шымлат да варажым вуз ден колледж -влакын студентыштым тидлан туныктат.

Пленарный заседаний годым С.Сметанин республикын шошо ага пашалан начарын огыл ямдылалтмыжым палемден. Тений шуктышаш паша план нерген каласкалымыж деч ончыч эртыше жапысе лектыш дене палдарен.

- 2018 ийыште 41 миллиард теҥгеаш ялозанлык продукцийым ыштен налме. Тидыже ончылийсе деч лу процентлан шукырак. Ялозанлык продукцийым ыштен налме индекс шотышто республик Юл кундем федерал округышто икымше верым айла, Россий Федерацийысе регион-влак коклаште - визымшым, - палемден С.Сметанин.

Сай кўкшытыш ик миллиард утла теҥге кугыжаныш полышым пуымылан  кєрат шумо. Республикын агропромышленный комплексышкыже ныл миллиард чоло теҥге инвестицийым пыштыме. Тидыже ончылийсе деч 1,5 пачаш шукырак.

Правительстве председательын икымше алмаштышыже совещанийын участникше-влакын тўткышыштым республик вуйлатышын позицийжылан ойырен – ялым социально вияҥдаш утларак кугу тўткышым ойырыман. Ялозанлык отрасльым вияҥдымаш Марий Элым вуйлатыше-влаклан ик эн ончыч шуктышаш задачыштлан шотлалтеш. Тений икымше кварталыште шєр озанлыкым вияҥдаш 60 миллион утла теҥге кугыжаныш полышым ойырымо, шошо агам эртарен колташ – 50 миллион чоло теҥгем.

С.Сметанин тыгак палемден: республик ончылан шындыме задачым шуктымаште ялозанлык предприятий вуйлатыше-влак веле огыл тыршышаш улыт, кугу рольым муниципал образований ден ял шотан илем вуйлатыше-влакат шуктышаш улыт. Кўчык жапыште яра кийыше мландылан инвентаризацийым эртараш да кучылташ тўҥалаш – тыгай задачат моткоч кўлешан.

Пленарный заседаний деч вара кок секцийыште каҥашымаш эртен. Икымшыштыже ялозанлык техникым да шапаш ужашым кондымо,  кокымшыштыжо сай урлыкашым ситарыме, кушкылым аралыме средства ден минеральный ўяҥдышым кучылтмо йодышлам ончымо.