СВО-што участвоватлыше сарзе-влакын ватышт ден авашт Марий Элым вуйлатышылан «Кичиер» санаторийыште канымышт нерген каласкаленыт.
Кызыт палемдыме еҥ-шамыч Юрий Зайцевын кӱштымыж почеш Волжский районышто верланыше «Кичиер» санаторийыште лӱмынак организоватлыме сменыште тазалыкыштым пеҥгыдемдат. Тидлан Марий Эл правительствын резерв фондшо гыч 3,3 млн.теҥгем ойырымо.
Регионым вуйлатыше ӱдырамаш-шамычлан чытышыштлан, умылымыштлан да элым аралыше-влаклан полшымыштлан тауштен.
«Элна неле кредалмашым эртара, да тендан лишыл еҥда-шамыч: марийда, эргыда, иза-шольыда-влак ончыл радамыште лӱддымылыкым ончыктат. Нимом шотыш налде, шкендан аралышыда-шамыч пелен улмыланда вуем савем. Те нунылан шӱм-чонда дене полшеда. Тендан полышда мемнан сарзына-влаклан моткоч кӱлеш», – манын тудо.
СВО-н участникше-влаклан регионысо кучем-шамычат кертмышт семын полшат, ешарен Ю.Зайцев.
«Сарзе-влаклан чылажымат ситараш тыршена. Службышт ден илышыштым куштылемдаш манын, вургемым, йолчиемым, продуктым, технический средствам, саргураллан тӱрлӧ йӧнештарымашым, глушительым, бинокльым, квадрокоптерым – чыла колтена. Командир-шамыч дене кылым кучена. Шуко сарзе шкеак мыланем воза, южышт мыйым лично палат. Икте-весе коклаште кылым ыштенна. Нуно палат, мыйын омсам нунылан эре почмо. Иктышт йодышыштым рашемдаш толыт, весышт – просто мутланаш, иктаж-мо нерген каласкалаш, проблемышт дене пайлалташ. Но мемнан кугу ответственностьна – тендан, геройна-влакын ешышт, ончылно. Ме социальный полыш мере-шамычым пуртенна, льгото-влак вийыште улыт. Да, чылажымак вигак решатлен огына керт, но ме эре йӧным кычалына. Иктаж-кушко логалын але йодышланда вашмутым муын огыда керт гын, мый эреак полшаш ямде улам», – палемден республикым вуйлатыше.
Ю.Зайцев специальный военный операцийым эртарыме кумдыкышто вуйым пыштыше герой-влакым шарныме лӱмеш мемориалым ыштыме темылан посна тӱткышым ойырен. Мутшо почеш, кызыт тиде йодышым каҥашат, Марий Элыште тыгай верым тӱзаташ палемдат.
Ик военнослужащийын пелашыже Ю.Зайцевлан сменым организоватлымыжлан тауштен да каналташ толмо амалым рашемден.
«Мыланем йыҥгыртымекышт да санаторийыш ӱжмекышт, пелашем лачак госпитальыште эмлалтеш ыле. Мый тудлан республикым вуйлатышын тыгай йӧным ыштымыж нерген каласкалышым да шкемын пешыже канымем огеш шу маньым. «Ит шонкале, тый кайышаш улат. Марий Элым вуйлатыше молодец. Пеш сай, кунам полшат», – вашештыш марием», – манын тудо.
Ик ава СВО-што участвоватлыше эргыжын тений 23 февральыште геройла колымыж нерген каласкален да поснак кызыт полыш ден эҥертыш кӱлмым палемден.
«Илышыште эҥертыме кугурак йоча-влакым йомдарыме годым полыш моткоч кӱлеш. Кызыт ава-влак Тендан деч тугай ӱшанле ваче ден эҥертышым ужыт. Тау тыланда. Кызытеш ме сеҥыше тукымым йомдарен огынал, Россий ила да эре илаш тӱҥалеш», – манын тудо.
Ю.Зайцеват Российын обязательно сеҥымыжлан ӱшанымыжым ойлен.
«Сеҥымашым моткочак вучем. Рвезына-шамыч арам огыт кредал. Уке гын чын огеш лий, мемнан элна огеш лий. Ме мемнам курымла дене пытараш шонышо-влак дене кредалаш пижынна. Да тендан йӧратыме еҥда-шамыч тиде кредалмаште герой улыт», – вашлиймашым мучашлымыж годым ешарен Ю.Зайцев.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
