Марий Эл вуйлатышын пашажым жаплан шуктышо Юрий Зайцев Оршанке районышто илыше-влак дене вашлийын. Кугунур школышто кочмыверым чоҥымо йодыш шотышто тудо тыгайрак вашмутым пуэн: «Тылеч ончыч школьник-влакым километр ӧрдыжкӧ кочкаш шупшыктеныт. Подрядчик объектым август кыдалне пашаш колтышаш, у тунемме ий тӱҥалмылан чыла ямде лийшаш». Эн пӱсӧ йодыш-влакым тарватымекше, район вуйлатыше Александр Плотников Каракша – Табашино коклаште газ пучым шупшмо пашаште лекше нелылыкым кораҥдаш полшымылан, Табашиныш пӱртӱс газ толмылан таум ойлен. Кок йочан аван «Оршанке кыдалаш школ кӧргыштӧ олмыктымо пашам кунам тӱҥалыт?» йодышыжлан Марий Элын образований да науко министрже Лариса Ревуцкая, «2023 ийыште капитально олмыктымаш палемдыме» манын вашештен: «Сметым ыштыме. Школлан 100 миллион теҥге ойыралтеш, оборудований-влакым наледаш эше 6,5 миллион теҥгем ешарыме». Пуялыште ФАП-ым почмо нерген мут лекмек, республикын Тазалыкым аралыше министрже Марина Панькова ты ялыште илыше-влаклан медицине полышым мобил бригаде-влак кӱрылтде да яра пуаш тӱҥалыт манын ӱшандарен каласен. Ильинка – Пуял корным олмыктымо шотышто тыгай вашмут йоҥгалтын: ты пашам 2023 ий гыч тенийыш кусарыме да сентябрь марте ыштен шуктымо лиеш.
«Тендан дене мутланымаш мыланем пеш келшыш. Район вуйлатыше дене вашлийын, тудын деч могай проблеме-влак улмо нерген йодышташ толын омыл. Тендан шонымашдам палымем шуын», – каласен Юрий Зайцев.
Оршанке посёлкысо Чап аллейым тӱзатымаш «Илыме вер да оласе среда» нацпроект почеш кок йыжыҥ дене эрта», – каласен район вуйлатыше Александр Плотников вашлиймаш годым. Тений шуктымо паша 3 миллион теҥгеш шуэш. Кугу Отечественный сарыште вуйыштым пыштыше-влакын лӱмыштым возыман мемориалым шушаш ийыште ышташ палемдыме. А.Плотниковын мутшо почеш, ты кундем гыч фронтыш 6 тӱжем еҥ каен, 1,5 тӱжемже гына пӧртылын. «Самырык тукым герой-влакым палышаш», – калыкын каныме да историй шарнымашым аралыше верым ончен савырнышыжла каласен Юрий Зайцев.
Район вуйлатыше «Лӱдыкшыдымӧ да сай качестван корно» нацпроект почеш Пограничная уремын 2,5 метр кутышыжо капитально олмыкталтме нергенат ойлен да тыгодым палемден: тиде корно больницым да шке вий дене илыме верым чоҥымо микрорайоным уша, чумыр пашан акше 48 миллион нарыш шуэш.
Ты кечынак Юрий Зайцев «Оршанке кинде» ООО-н пашаж дене палыме лийын. Предприятий директор Нияз Гараевын мутшо почеш, нуно идалыкыште 3 тӱжем тонн киндым да кинде-булкым луктыт, продукцийыштым Марий Элыште, Киров кундемысе Яранск районышто ужалат, Йошкар-Ола, Казань да Волжск олалсе социальный учрежденийла ден больницылашке колтат. Тӱҥ шотышто Оршанке районышто да рӱдолаште илыше-влак налыт. Ончыкыжым ужалыме сатун кугытшым ассортиментым ешарыме да у автомат линийым пашаш колтымо кӱшеш кугемдаш шонат. Тидыже паша лектышым нӧлталаш да у паша верым ышташ полшышаш.
«Кинде качествыда сай. Ужалыме рынкыдам кумдаҥдаш кӱлеш», – каласен Юрий Зайцев кочкышым тамлен ончымекыже да ты шотышто полшаш сӧрен.
Каласен кодыман, киндым ыштен лукшо предприятий-влак тений кугыжаныш деч 22 миллион теҥге субсидийым налыт.
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
