|
Моло дене пырля – Марий Элат
06.05.2020
28 апрельыште Российын президентше В.Путин элнан субъектлажым вуйлатыше-шамыч дене коронавирус инфекцийын шарлымыж ваштареш шогымо шотышто видеоконференцийым эртарен. Тудо кучем-шамычын коронавирус дене кучедалме шотышто у позицийыштым да регион-влакын чарыме режим гыч 12 май деч вара эркын дене кузе лекташ тӱҥалмышт нерген ойлен. Тидын дене келшышын, В.Путин РФ правительствылан бизнеслан полшымо мере-влак пакетым ямдылаш кӱштен. Тылеч посна тудо 6-8 май пагытым пашам ыштыдыме кече семын увертарен. Рашемденрак каласаш гын, граждан-влак 1 гыч 11 май йотке пашадарым йомдарыде канат. Российын президентше тыгак вашкеполыш службын пашаеҥже-шамычлан официальный пайремым учредитлен да 28 майым Вашкеполышым пуышо пашаеҥын кечыже семын увертараш темлен. «Ме эпидемийым шарлымыжым чарен кертынна. Тиде – пырля тыршымын лектышыже, врач ден специалист-шамычын каҥашыштым колыштшо да шотыш налше, шке тазалыкым эскерыше да лишыл-влак верч азапланыше, кучем орган-влакын темлымыштым шуктышо элысе миллион дене гражданын ответственностьшо. Специалист ден шанчызе-влак, а ме нунын дене чак пашам ыштена, пикым эше эртен огынал маныт», - каласен В.Путин. Марий Элын Социальный вияҥмаш министерствыжын ведомствышкыжо пурышо социально обслуживатлыше организаций-влак 15 апрель гыч социальный услугым налше-влак дене пырля шке кумылын самоизоляций режимыш куснат. Таче кечылан тыгай форматыште шым тӧнеж пашам ышта. Рашемденрак каласаш гын, 198 пашаеҥ услугым налше 909 еҥым шке тӧнежыштак мӧҥгыш лекде онча. Самоизоляцийыш эше Красногорский, Кожласола, Кундыштӱр психоневрологический интернат-влакым да Илалше ден инвалид-шамычлан палемдалтше Карлыган интернат-пӧртым колташ ямдылат. Тыге, посна улмо режимыш 126 пашаеҥ ден социальный услугым налше 900 граждан куснат. Регионыштына Самырык-влакын полатыштышт верланыше Добровольчествылан полшышо ресурс рӱдерыште коронавирус инфекций шарлыме жапыште калыклан полшышо #МЫВМЕСТЕ волонтёр штаб пашам ышта. |
Моло дене пырля – Марий Элат
