2023 ийыште Марий Элыште туризмым вияҥдыме пашалан 130 миллион теҥге ойыралтын.
Тулеч ончычсо ий дене таҥастарымаште, федерал ден республикысе бюджетла гыч ты отрасльым вияҥдаш ойырымо субсидий кугыт кок пачаш кугемын. Тидын нерген Туризмым вияҥдыме шотышто РФ Правительстве пеленысе комиссийын видео-конференций йӧн дене эртарыме заседанийыштыже ойленыт. Тушто ты сферысе кодшо идалыкысе пашам иктешленыт да ончыкылан планым каҥашеныт. Заседанийым РФ Правительстве председательын алмаштышыже Дмитрий Чернышенко вӱден.
Марий Элыш толшо турист чот тыгак ешаралтеш. СберАналитикын данныйже почеш, 2023 ийыште регионыш чылаже 1 миллион утла экскурсант толын коштын. Кодшо ийын республикна «Туризм и индустрия гостеприимства» национальный проектыш ушнен. Конкурс гоч ойырен налме иктешлымаш почеш, Марий Эл турист-влакым капитально огыл вераҥдыме модульный оралте-влакым чоҥаш кугыжаныш полышым налын. «Корпорация Туризм.РФ» АО-н полшымыж дене «ВУДЛЕНД» ТРК инвестиционный проект илышыш шыҥдаралтеш. Тудын тӱҥ шонымашыже – 2027 ийлан кызытсе жаплан келшыше 4 турист объектым ыштен шуктышаш. А тиде – 576 еҥлан илаш келыштарыме 179 номеран фонд. Республик кӧргыштӧ да тудын деч ӧрдыжкӧ лектын коштмо шотышто Марий Эл вуйлатышын ойырымо грантше кӱшеш «Этноэкологий форум» ден «Летим в край звонких гуслей, в Марий Эл!» проект-влак илышыш шыҥдаралтыныт.
Кодшо ийын Марий Эл Минскыште туризм сферыште ваш келшен пашам ыштыме шотышто Беларусь Республикын Туризм шотышто национальный агентствыж дене ойпидышым ыштен. «Беларусь – Марий Эл» тӱнямбал кӱкшытан маршрут ышталтеш. Видео-конференций годым регион вуйлатыше Юрий Зайцев тыгак палемден: кызыт ВДНХ-ашке Марий Элын экспозицийжым ончаш толшо-влак поснак шукын улыт.
Марий Эл вуйлатышын администрацийжын информаций паша пӧлкажын уверже негызеш С.Носова ямдылен
