Марий Эл вуйлатыше Юрий Зайцевлан суд системым вияҥдымашке кугу надырым пыштымыжлан, Россий Федерацийыште правосудийым пеҥгыдемдаш да саемдаш полшымыжлан Россий Федерацийын Верховный Судшо пеленысе Судебный департаментын «За взаимодействие» I степенян медальже дене палемденыт. Тудым департаментын генеральный директоржын алмаштышыже Алексей Слотюк кучыктен.
Регион вуйлатыше Марий Элыш толшо уналан пашажлан тыгай кугу акым пуымыжлан тауштен да палемден:
– Очыни, чылажымак вигак илышыш пурташ огеш лий. Южо йодышым решатлаш шуко жап кӱлеш. Но паша ышталтеш.
– Чыла вере тыге огыл. Эл мучко мый шуко кудалыштам. Тендан дене паша сайын шукталтеш, – палемден Алексей Слотюк.
Вашлиймаште тыгак судебный кучемын чапшым нӧлталаш, профессийлан тӱткышым ойыраш кӱлмӧ нерген мутланеныт.
Вашлиймаш мучаште Марий Эл вуйлатыше диалогын кӱлешлыкшым палемден да Россий Федерацийыште правосудийым саемдышашлан исполнительный кучем орган-влак шке компетенцийышт дене келшышын полшаш тӱҥалыт манын ӱшанен каласен.
Марий Эл Вуйлатышын администрацийжын информаций паша пӧлкажын уверже негызеш Л.Камалетдинова ямдылен
