«Ме тендан дене кугешнена»

​Марий Элым вуйлатыше Александр Евстифеев республикысе Правительстве пӧртыштӧ самырык профессионал-влак – «Worldskills» толкынын сеҥышыже да призёржо-влак дене вашлийын.

Чайым йӱмӧ годым погынышо-влак пашазе профессий дене кылдалтше таҥасымаш, тудын кӱлешлыкше да ончыкылыкшо нерген мутланеныт.

Регион вуйлатыше эллан «Worldskills» толкынын кӱлешлыкше шотышто палемден каласен, примерлан Россий президент В.Путинын позицийжым конден да ӱдыр-рвезе-влакым сеҥымашышт дене серлагаш огыл – ончыко да ончыко каяш ӱжын. «Ме тендан дене кугешнена»,– каласен тудо.

Вашлиймаш годым А.Евстифеев ушештарен: «Worldskills» толкынын материально-технический базыжлан тений регионын бюджетше гыч 14 миллион теҥге ойыралтын. Марий Эл образований да науко министр Н.Адамован мутшо почеш, тиде оксам лабораторий ден площадкылам уэмдаш, ешартыш компетенцийлан у оборудованийлам налаш кучылтмо. Мутлан, Оршанке колледж пеленысе «Дошкольный образований», Марий чодыра озанлык техникум пелен «Ландшафт дизайн», тыгак Марий радиомеханический техникум пелен токарь паша да Web-дизайн дене кылдалтше площадке-шамыч почылтыныт.

Мучашлан регион вуйлатыше «Worldskills» толкынын ик эн чолга еҥже да таҥасымаште сеҥышыш лекше-влакым саламлен. Марий Эл Республикын Чап грамотшо дене торгово-технологический колледжын директоржо, Профессионал образованийым пуышо тӧнеж-влакын ассоциацийыштым вуйлатыше Т.Венедиктова. Индустрий да предпринимательстве колледжын студентше, 2018 ийыште «Самырык профессионал-влак» национальный конкурсын бронзо призёржо К.Бадьинлан да тудын туныктышыжо Э.Яштыковалан Марий Эл вуйлатышын Тауштымашыжым кучыктеныт.