Юрий Зайцев: «Социальный полыш Марий Эл Республик правительствын ик эн ончыч шуктымо пашажлан шотлалтеш».
9 февральыште регионым вуйлатыше Ю.Зайцев республикысе Паша да социальный аралымаш министерствын коллегийжын заседанийыштыже участвоватлен. Тушто тудо отрасль ончылно кӱлешан да пӱсӧ йодыш-влакын шогымыштым палемден.
Паша да социальный аралымаш министр Марина Островская отрасльын 2023 ийысе паша лектышыж дене палдарен. Ушештарымыж гыч, ӱмаште министерствылан ийготыш шудымо-влакым опекыш налме шотышто у полномочийым пуэныт, тыгак паша ден пашам ситарымаш блокым ушеныт.
«2023 ийыште республикыште илыше калыклан социальный полышын 55 мерыжым ыштыме, нуным 280 тӱжем еҥ налын. Марий Элым вуйлатышын пунчалже почеш кугыжаныш бюджет тӧнеж пашаеҥ-влакын окладыштым 25 процентлан кугемдыме. Социальный тӧнеж-шамычын транспортыштым уэмдаш регионысо бюджет гыч 50 миллион теҥгем ойырымо», – каласкален М.Островская.
«Демографий» национальный проектын «Йоча шочмо годым еш-влаклан окса полыш» федеральный проектшат илышыш сайын пурталтеш. Социальный полышын мерыже-влак дене 5580 еш пайдаланен.
«Кугурак тукым» федеральный проектым илышыш пуртымо кышкарыште Илалше еҥ ден инвалид-шамычлан Йошкар-Оласе «Сосновая роща» интернат-пӧртын зданийже уэмден олмыкталтеш.
Отрасль СВО-н участникше-влаклан да нунын ешыштлан социально полшымо ешартыш мере почеш регионын бюджетше гыч 600 миллион утла теҥгем кучылтмо.
Специальный военный операцийым эртарыме кумдыкышто улшо военнослужащий-влаклан, Луганск да Донецк калык республиклаште, Запорожский ден Херсон областьлаште илыше калыклан, тыгак Украина гыч Марий Элыш куснен толшо граждан-шамычлан гуманитар полышым ыштыме.
Ю.Зайцев отрасльын паша лектышыжлан сай акым пуэн.
«Отрасльын кужу жап ончымо системе ден социальный ойпидышым илышыш пуртымо паша лектышыжым палемдынем. Нине показатель-влак дене республикнам Россий Федерацийын регионжо-шамыч коклаште ик эн кӱкшын аклат. Тидыже, мутат уке, министерстве ден чумыр отрасльын паша лектышышт. Министерстве регионышто сай тыл ден социальный эсенлыкым ышта. Тиде кӱкшӧ профессионализмым, тӱткышым да поро кумылым йодшо пашан пеш кугу лончыжо», – манын регионым вуйлатыше.
Ю.Зайцев ешлан полшымо пашамат поснак кӱлешан семын палемден.
«Российын президентше 2024 ийым Ешын идалыкше семын увертарен. Мемнан ончылно аза шочмо чотым кугемдыме, ава ден йоча-шамычлан полшымо шотышто пеш кугу паша шога. Тӱҥ мере-шамыч ешым аралымашке да тудлан сайын илаш йӧным ыштымашке виктаралтыныт. Демографийым саемдыме йодышла дене чылалан пашам ышташ кӱлеш», – заседанийым мучашлен Юрий Зайцев.
Марий Эл Республикым вуйлатышын пресс-службыжын уверже негызеш М.ИВАНОВА ямдылен
