«Марий теле» фестиваль 9 декабрьыште Э.Сапаев лӱмеш опер да балет академический театрыште «Война и мир» балет дене почылтын.
Зал тич погынышо калыкым Марий Эл Правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов ден Йошкар-Олан мэрже Евгений Маслов саламленыт.
– Таче – Элын геройжо-влак кече, садлан постановкын премьержымат таклан огыл тиде кечылан палемдыме. Марий Эл вуйлатыше Юрий Зайцевын темлымыж почеш эртаралтше «Марий теле» фестивальым почына, – палемден К.Иванов.
Е.Маслов ешарен, фестиваль оласе калыкын тӱвыра илышыжым вестӱрлыракым ышта да «Марий теле» республикыште илыше ден тышке унала толшо-влаклан келша манын ӱшаныме шуэш.
Фестивальыш театр, культур полат, библиотеке, тоштер, парк, спорт сооружений-влак ушненыт. 9 декабрь гыч 25 февраль марте республикыштына концерт да жапым веселан эртарыме программе, театр постановко, йоча мероприятий, кас дискотеке-влак эртаралтыт. Афишым тӱвыра министерствын сайтыштыже ончаш лиеш.
А.Байкова
