Йошкар-Олаште, Э.Сапаев лӱмеш опер да балет академический театрыште, Никита Михалковын да иза-шольо Пресняковмытын «12» спектакльышт эртен.
Артист-влакын мастарын модмыштым да лӱмынак нуным саламлаш Марий Эл вуйлатыше Юрий Зайцеват миен коштын.
Спектакль самырык еҥ нерген. Тудым ачажым пуштмылан титаклат. Тидым латкок присяжный каҥашат. Нунын могай иктешлымашым ыштымыштым меат, залыште шинчыше-влак, чот вученна, артист-влак дене пырля ойгыренна. Ойлымо кажне шомакышт, монолог ден диалогышт келге шонымашан, илыш нерген шонаш, чаманаш, еҥ-влак деке мелын лияш таратыше, правам да шкем кузе кучаш кӱлмӧ нерген.
Тӱҥ рольышто Никита Михалков, Николай Бурляев, Сергей Степанченко да Владимир Долинский модыныт.
Регион вуйлатыше артист-влакым сай спектакльлан тауштен да тыгерак ойлен: «Кумдан палыме артист-влакым шкенан республикыштына вашлияш кугу чап да пиал. Зал калыкат моткоч шокшын вашлие. Сценыште модмыдам куанен ончышым. Тау тыланда».
Российын калык артистше, режиссёр-постановщик Никита Михалковат ончышо-влакын кумылыштым шижын, каласен: «Тиде мотор оласе театрыште калык зал тич чумырген. Кеч-кӧ кеч-мом ойла гынат – сеҥымаш мемнан кидыште лиеш!»
Марий Эл вуйлатышын администрацийжын информаций паша пӧлкажын уверже негызеш А.БАЙКОВА ямдылен
