Марий пӱртӱс пояш полша

Кодшо кугарнян РФ Президентын Юл кундем федерал округын советшын Казаньыште эртыше заседанийыштыже Марий Эл вуйлатыше Александр Евстифеев республикыштына туризмын вияҥмыж дене палдарен. Мероприятийыште Кугыжаныш Думын, Федераций Советын, федеральный министерстве ден ведомство, мер организаций-влакын еҥышт, округысо регион вуйлатыше-шамыч лийыныт.

Заседанийым почмо годым Юл кундем федеральный округышто Россий президентын полномочный представительже Игорь Комаров каҥашыме теме пӱтынь округлан моткочак кӱлешан, турист отрасль у паша вер-влакым ышташ кумылаҥда, моноола ден ял шотан илем-влаклан ешартыш йӧным пуа манын палемден.

Заседанийыште федеральный да регион кӱкшытыштӧ турист отрасльым вияҥдыме дене кылдалтше ятыр йодышым онченыт. Марий Элыште эл кӧргысӧ да ӧрдыж гыч толшо турист-влакым вашлияш чыла йӧн уло. Ик эн сайын этнографий, ял, вӱд-круиз, тазалыкым пеҥгыдемдыме, спорт, экологий туризм направлений-влак вияҥыт. Экологий туризмым вияҥдыме республикысе паша опыт эсогыл «Лучшие практики экологического туризма в Российской Федерации» сборникышкат пурталтын. Тудым Российын Тӱвыра министерствыже ямдылен.

Эртыше идалыкыште 2025 ий марте Марий Элыште туризмым вияҥдыме стратегийымат пеҥгыдемдыме.

Заседанийыште туризм отрасльым вияҥдаш полшышо документ-влакым,  законодательстым уэмдыме шотышто темлымаш шуко лийын. Полпредын пресс-службыжын увертармыж почеш, Юл кундем федерал округышто туризм начарын огыл вияҥеш. 2018 ийыште турист-влакын чотышт 14 миллион еҥ марте кушкын. Тидыже 2015 ий дене таҥастарымаште 31 процентлан шукырак. Йот эл гыч толшо турист-влакын чотыштат 5,4 процентлан ешаралтын. Кодшо ийын турист сектор деч тӱрлӧ кӱкшытан бюджетыш 594 миллион теҥге налог пурен. 2017 ий дене таҥастарымаште, тидыже 40 миллион теҥгелан шукырак.

Тыгай лектышыш шуаш, мутлан, тений Морко районысо Унчо селам финн-угор тӱнян тӱвыра рӱдолажлан шотлымат полшен, палемден Марий Эл вуйлатыше. Ойлымыж почеш, «Чудеса земли Марийской» ден «Край звонких гуслей» республикысе маршрут-влакым Россий Туроператор-влакын ассоциацийышт ПФО-што ик эн ончыч Российын бренд маршрутшо-влак радамыш пуртен да нуным элысе туроператор-влаклан темленыт. Тыгак Александр Евстифеев Марий Элыште илыше-влаклан сайын палыме да йӧратыме пайрем, фестиваль, ойыртемалтше сылне верже-влак пытартыш ийлаште пӱтынь эл мучко чапланаш тӱҥалыныт манын ойлен. Тидым национальный рейтинглаште ончыл верыш лекме да всероссийский конкурслаште сеҥыше-влак радамыш логалме пеҥгыдемдат.

Александр Евстифеевын шонымыж почеш, туризмым вияҥдымаште кугу верым транспорт налеш. Тыште тудо тений кеҥежым аэропортын уэш пашам ышташ тӱҥалмыжым, турист-влакын мемнан республикыш Юл эҥер дене толын кертмыштым поснак палемден. Тыгодым каласен коден: Марий Элыште туризм сферым утларак вияҥдаш пассажирский ден маломерный судоходствылан сай йӧн укелык чаракым ышта.

Докладым мучашлымыж годым Александр Евстифеев протокол пунчалыш вӱд туризмым вияҥдаш полшен кертше мероприятий-влакым илышыш пуртымо дене кылдалтше пунктым ешараш, тыгодым ты шотышто Марий Элым пилотный регионлан палемдаш темлен. Тыгак туризмым субъект-влак коклаште чулымынрак вияҥдаш кӱлмӧ нерген ойлен. Тидлан причалым тӱзатымат полшен кертшаш манын палемден.

- Марий Элыште Кокшайск села уло. Тудо кум республикыште: Марий Элыште, Чувашийыште да Татарстаныште - илыше-влакын каныме верышт. Кызыт тушто причалым шотыш кондымо паша кая. Тиде – ПФО-што субъект кокласе туристический сообществын ик примерже, - каласен Александр Евстифеев.

Марий Эл вуйлатыше тыгак туризмын вес направлений-влак дене, мутлан, промышленность, ялозанлык, медицине, корным да илыме верым чоҥымаш дене, вашкылже улмым палемден.